୨ ଝିଅଙ୍କ ଆଖି ସାମ୍ନାରେ ସାମ୍ବାଦିକଙ୍କୁ ଗୁଳିମାଡ଼ ଘଟଣା: ଚିକିତ୍ସାଧୀନ ଅବସ୍ଥାରେ ଆଖି ବୁଜିଲେ ସାମ୍ବାଦିକ

ଲକ୍ଷ୍ନୌ: ଗାଜିଆବାଦରେ ଜଣେ ଜଣାଶୁଣା ସାମ୍ବାଦିକଙ୍କୁ ଗୁଳିମାଡ଼ ଘଟଣାରେ ପୋଲିସ୍‌ ୯ଜଣଙ୍କୁ ଗିରଫ କରିଛି। ତେବେ ଚିକିତ୍ସାଧୀନ ଅବସ୍ଥାରେ ଆଜି ସକାଳେ ସମ୍ପୃକ୍ତ ସାମ୍ବାଦିକଙ୍କ ମୃତ୍ୟୁ ଘଟିଛି। ତାଙ୍କ ନାଁ ବିକ୍ରମ ଯୋଶୀ। ସୋମବାର ବିଳମ୍ବିତ ରାତିରେ ଦୁର୍ବୃତ୍ତମାନେ ବିକ୍ରମଙ୍କ ଉପରକୁ ଗୁଳିମାଡ଼ କରିଥିଲେ।

ମିଳିଥିବା ସୂଚନା ଅନୁସାରେ, ସୋମବାର ବିକ୍ରମ ତାଙ୍କ ୨ ଝିଅଙ୍କ ସହ ବାଇକ୍‌ରେ ଯାଉଥିବା ବେଳେ ବିଜୟନଗର ଅଞ୍ଚଳରେ ଦୁର୍ବୃତ୍ତମାନେ ତାଙ୍କ ଉପରକୁ ଆଖିବୁଜା ଗୁଳିମାଡ଼ କରିଥିଲେ। ତା’ବି ପୁଣି ତାଙ୍କ ଝିଅଙ୍କ ସାମ୍ନାରେ ଏହି ଗୁଳିମାଡ଼ ହୋଇଥିଲା। ଗୁରୁତର ଅବସ୍ଥାରେ ବିକ୍ରମଙ୍କୁ ଗାଜିଆବାଦର ନେହେରୁ ନଗର ସ୍ଥିତ ଯଶୋଦା ହସ୍ପିଟାଲ୍‌ରେ ଭର୍ତ୍ତି କରାଯାଇଥିଲା। ହେଲେ ଆଜି ସକାଳେ ତାଙ୍କର ମୃତ୍ୟୁ ଘଟିଛି।

ସାମ୍ବାଦିକ ବିକ୍ରମଙ୍କ ଉପରେ ଆକ୍ରମଣ ଘଟଣାର ପୂରା ଦୃଶ୍ୟ ସିସିଟିଭିରେ କଏଦ ହୋଇଛି। ସିସିଟିଭିରେ ଦେଖିବାକୁ ମିଳିଛି, ବିକ୍ରମ ତାଙ୍କ ୨ ଝିଅଙ୍କ ସହ ବାଇକ୍‌ରେ ଯାଉଛନ୍ତି, ଏହି ସମୟରେ ଦୁର୍ବୃତ୍ତମାନେ ପ୍ରଥମେ ତାଙ୍କୁ ଅଟକାଉଛନ୍ତି। ଏହାପରେ ତାଙ୍କୁ ମାଡ଼ ମାରିବା ସହ ଆଖିବୁଜା ଗୁଳିମାଡ଼ କରିଥିଲେ। ସିସିଟିଭରେ ଆହୁରି ମଧ୍ୟ ଦେଖିବାକୁ ମିଳିଛି, ଏହି ଘଟଣାବେଳେ ବିକ୍ରମଙ୍କ ଦୁଇ ଝିଅ ଭୟଭୀତ ହୋଇ ପ୍ରାଣ ବିକଳରେ ଦୌଡ଼ିବା ଆରମ୍ଭ କରିଥିଲେ।

ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର ହେବାପରେ ବିକ୍ରମଙ୍କ ୨ ଝିଅ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ହସ୍ପିଟାଲ୍‌ରେ ଭର୍ତ୍ତି କରିଥିଲେ।

ସୂଚନାଥାଉ କି, କିଛି ଦିନ ତଳେ ବିକ୍ରମଙ୍କ ଭାଣିଜୀଙ୍କୁ କିଛି ଦୁର୍ବୃତ୍ତ ଦୁର୍ବ୍ୟବହାର କରିଥିବା ନେଇ ସେ ଥାନାରେ ଅଭିଯୋଗ କରିଥିଲେ। ଏହି ଘଟଣାର କିଛି ଦିନ ପରେ ବିକ୍ରମଙ୍କ ଉପରେ ଗୁଳିମାଡ଼ ହୋଇଛି। ତେଣୁ ଏହି ଘଟଣାକୁ କେନ୍ଦ୍ର କରି ତାଙ୍କ ଉପରେ ଆକ୍ରମଣ ହୋଇଥାଇ ପାରେ ବୋଲି ଅନୁମାନ କରାଯାଉଛି।

You might also like