ବିଦେଶରୁ ଅକ୍ସିଜେନ୍ ଓ ମେଡିକାଲ ଉପକରଣ ନେଇ ଆସିଲା ଆଇଏନ୍ଏସ୍ ଐରାବତ

ନୂଆଦିଲ୍ଲୀ: କରୋନାର ଦ୍ଵିତୀୟ ଲହରରେ ଅଣନିଶ୍ୱାସୀ ହେଉଛି ଭାରତ । କରୋନା ସହ ଲଢ଼ିବା ପାଇଁ ସାଧନର ଘୋର ଅଭାବ। ଏପରି ସ୍ଥିତିରେ ବିଦେଶରୁ ଛୁଟୁଛି ସହାୟତାର ସୁଅ । କରୋନା ସେ ଲଢ଼ିବା ପାଇଁ ଦେଶ ଭିତରେ ବି ସବୁ ଶକ୍ତି ଏକଜୁଟ ହୋଇଛନ୍ତି।

କେବଳ ଦେଶ ସୁରକ୍ଷା ନୁହେଁ, ଦେଶର ପ୍ରତିଟି ମଣିଷକୁ କରୋନା ମହାମାରୀରୁ ବଞ୍ଚାଇବା ଲାଗି ଭାରତୀୟ ନୌସେନା ଲାଗିପଡ଼ିଛି।ସମୁଦ୍ର ସେତୁ ଅଭିଯାନ ଜରିଆରେ ବିଦେଶରୁ ଅକ୍ସିଜେନ୍ ଓ ମେଡିକାଲ ଉପକରଣ ଆଣୁଛି ନୌସେନା।  ଭାରତୀୟ ନୌସେନାର ଟ୍ୟାଙ୍କର ପରିବହନକାରୀ ଜାହାଜ ଆଇଏନ୍ଏସ୍ ଐରାବତ ମେଡିକାଲ ଉପକରଣ ଆଣି ବିଶାଖାପାଟଣାରେ ପହଞ୍ଚିଛି ।

ସିଙ୍ଗାପୁରରୁ ମେ ୫ରୁ ବାହାରିଥିବା ଏହି ଜାହାଜରେ ୮ଟି କ୍ରାୟୋଜେନିକ ଖାଲି ଥିବା ଅକ୍ସିଜେନ୍ ଟ୍ୟାଙ୍କ, ୩୧୫୦ଟି ଖାଲିଥିବା ଅକ୍ସିଜେନ୍ ସିଲିଣ୍ଡର, ୫୦୦ଟି ଅକ୍ସିଜେନ୍ ଭର୍ତ୍ତି ଥିବା ସିଲିଣ୍ଡର, ୭ଟି ଅକ୍ସିଜେନ୍ କନସେନଟ୍ରେଟର, ୧୦ ହଜାର ରାପିଡ୍ ଆଣ୍ଟିଜେନ୍ ଟେଷ୍ଟ କିଟ୍ ଓ ୪୫୦ ପିପିଇ କିଟ୍ ଆସିଛି ।  ଏହା ପୂର୍ବରୁ ଭାରତୀୟ ବାୟୁସେନାର ବିମାନ ଆଇଏଲ୍-୭୬ରେ ୩ଟି କ୍ରାୟୋଜେନିକ ଅକ୍ସିଜେନ୍ କଣ୍ଟେନର ଆସିଥିଲା । କୋଭିଡ୍ ମୁକାବିଲାରେ ନୌସେନାର ୯ଟି ଯୁଦ୍ଧ ଜାହାଜ ମୁତୟନ ହୋଇଛି ।

ସୂଚନା ଥାଉ କି, ଦେଶରେ ୨୪ ଘଣ୍ଟାରେ ୩ ଲକ୍ଷ ୨୯ ହଜାର ୯୪୨ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିସହ ମୋଟ ଆକ୍ରାନ୍ତଙ୍କ ସଂଖ୍ୟା ୨ କୋଟି ୨୬ ଲକ୍ଷ ୬୨ ହଜାର ୫୭୫କୁ ବୃଦ୍ଧି ପାଇଛି । ସେହିପରି ୨୪ ଘଣ୍ଟାରେ କରୋନାରେ ପ୍ରାଣ ହରାଇଛନ୍ତି ୩ ହଜାର ୮ ଶହ ୭୬ ଜଣ । ଏହାକୁ ମିଶାଇ ଦେଶରେ କରୋନା ମୃତ୍ୟୁ ସଂଖ୍ୟା ୨ ଲକ୍ଷ ୪୯ ହଜାର ୯ ଶହ ୯୨କୁ ବୃଦ୍ଧି ପାଇଛି । ବର୍ତ୍ତମାନ ଆକ୍ଟିଭ କେସ୍ ୩୭ ଲକ୍ଷ ୧୫ ହଜାର ୨ ଶହ ୨୧ ଥିବାବେଳେ ଏ ଯାଏ ସୁସ୍ଥ ହେଲେଣି ୧ କୋଟି ୯୦ ଲକ୍ଷ ୨୭ ହଜାର ୩୦୪ ଜଣ ।

You might also like