କରୋନା ରୋଗୀଙ୍କ ସେବା କରି ସିଂଗାପୁର ରାଷ୍ଟ୍ରପତିଙ୍କ ଦ୍ୱାରା ପୁରସ୍କୃତ ହେଲେ ନର୍ସ

ନୂଆଦିଲ୍ଲୀ: ସିଂଗାପୁରରେ ରହୁଥିବା ଜଣେ ୫୯ ବର୍ଷୀୟ ମୂଳ ଭାରତୀୟ ନର୍ସଙ୍କୁ ତାଙ୍କର ସେବା ପାଇଁ ମିଳିଛି ରାଷ୍ଟ୍ରପତି ପୁରସ୍କାର। କୋଭିଡ-୧୯ ପରି ବିପଦକାଳିନ ସ୍ଥିତିରେ ଏହି ଭାରତୀୟ ମୂଳ ନର୍ସ ନିଜ ଜୀବନକୁ ପାଣି ଛଡେଇ ଯେପରି ରୋଗୀଙ୍କ ସେବା କରିଥିଲେ ତାହାକୁ ଦେଖି ସିଂଗାପୁର ରାଷ୍ଟ୍ରପତି ତାଙ୍କୁ ସମ୍ମାନିତ କରିଛନ୍ତି। ଏ ନେଇ ସେଠିକାର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି।

ଏହି ମୂଳ ଭାରତୀୟ ନର୍ସଙ୍କ ନାମ କଳା ନାରାୟଣସାମୀ। ତାଙ୍କ ସହିତ ସିଂଗାପୁରର ଆଉ ୪ ଜଣ ନର୍ସଙ୍କୁ ମଧ୍ୟ ଏହି ସମ୍ମାନରେ ସମ୍ମାନିତ କରାଯାଇଛି। ସେମାନଙ୍କୁ ଟ୍ରଫି ସହ ସାର୍ଟିଫିକେଟ ଏବଂ ୭, ୨୨୮ ଡଲାର ଦେଇ ରାଷ୍ଟ୍ରପତି ହଲିମ ୟାକୁବ୍‌ ସମ୍ମାନିତ କରିଛନ୍ତି। ସେ ଉଡ୍‌ଲ୍ୟାଣ୍ଡସ୍‌ରେ ସଂକ୍ରମଣ ନିୟନ୍ତ୍ରଣ ପ୍ରକ୍ରିୟାକୁ ସଫଳ ଭାବେ କାର୍ଯ୍ୟକାରୀ କରିଥିବାରୁ ତାଙ୍କୁ ସମ୍ମାନିତ କରାଯାଇଥିଲା। କଲା ନାରାୟଣସାମୀ ୨୦୦୩ରେ ସାର୍ସ (SARS) ସଂକ୍ରମଣ ନିୟନ୍ତ୍ରଣ ପ୍ରକ୍ରିୟା ଉପରେ ତାଲିମ ନେଇଥିଲେ।

ତେଣୁ କୋଭିଡ ସମୟରେ ନାରାୟଣସାମୀ ସାର୍ସର ଏହି ଅଭିଜ୍ଞତାକୁ ପ୍ରୟୋଗ କରି ସଫଳ ହୋଇଥିଲେ। ସେ ଏବେ ଉଡ୍‌ଲାଣ୍ଡସ୍‌ ହେଲ୍‌ଥ କ୍ୟାମ୍ପରେ ନିୟୋଜିତ ଅଛନ୍ତି।  ନିଜର ୪୦ ବର୍ଷର ଅନୁଭୂତିକୁ ଆଧାର କରି ସେ ନର୍ସିଂ ସେବାର ବିକାଶ ଦିଗରେ କାମ କରୁଛନ୍ତି ।

ସମ୍ମାନିତ ହେବା ପରେ ନାରାୟଣସାମୀ କହିଛନ୍ତି, ‘ ମୁଁ ସବୁବେଳେ ନୂଆ ହୋଇ ଏହି ସେବାରେ ପଶିଥିବା ନର୍ସମାନଙ୍କୁ କହେ, ନର୍ସିଂ ସେବା କେବେ ବି କାହାକୁ ନିରାଶ କରିବନି। ତୁମକୁ ତୁମ କାମର ପୁରସ୍କାର ନିଶ୍ଚୟ ମିଳିବ।

ସୂଚନାଥାଉ କି, ଯେଉଁମାନେ ନିରନ୍ତର ରୋଗୀ ସେବା କ୍ଷେତ୍ରରେ ନିଜକୁ ଉତ୍ସର୍ଗ କରି ଉତ୍ତମ ସେବା ପ୍ରଦାନ କରିଥାନ୍ତି ସେଇ ନର୍ସମାନଙ୍କୁ ରାଷ୍ଟ୍ରପତି ପୁରସ୍କାର ପରି ସମ୍ମାନଜନକ ପୁରସ୍କାର ମିଳିଥାଏ।

You might also like