ଭାରତୀୟ ଦୂତାବାସ କର୍ମଚାରୀଙ୍କୁ ଅପହରଣ ପରେ ଦିଆଯାଇଥିଲା ଅକଥନୀୟ ନିର୍ଯାତନା

ନୂଆଦିଲ୍ଲୀ: ଭାରତୀୟ ଦୂତାବାସର ୨ ଜଣ କର୍ମଚାରୀ ଡ୍ୟୁଟିରେ ଥିବାବେଳେ ଗତକାଲି ପାକିସ୍ତାନରୁ ନିଖୋଜ ହୋଇଯାଇଥିଲେ। ପରେ ଇସ୍‌ଲାମବାଦ ପୋଲିସ ପକ୍ଷରୁ କୁହାଯାଇଥିଲା, ଏକ ରାସ୍ତା ଦୁର୍ଘଟଣା ମାମଲାରେ ପାକିସ୍ତାନ ପୋଲିସ ୨ ଭାରତୀୟ ଦୂତାବାସ କର୍ମଚାରୀଙ୍କୁ ଅଟକ ରଖିଥିଲା। କିନ୍ତୁ ଏ ନେଇ ଭାରତୀୟ ଦୂତାବାସକୁ କୌଣସି ସୂଚନା ଦିଆଯାଇନଥିଲା। ପରେ ଉଭୟଙ୍କୁ ମୁକ୍ତି କରି ଦେଇଥିଲା ପାକିସ୍ତାନ।

ସବୁଠାରୁ ଆଶ୍ଚର୍ଯ୍ୟର କଥା,  ପାକ୍ ପୋଲିସ ଷ୍ଟେସନରେ ଏତଲା ଦେବାର ୭ ଘଣ୍ଟା ପରେ ୨ କର୍ମଚାରୀ ପୋଲିସ ହେପାଜତରେ ଥିବା ସୂଚନା ଦେଇଥିଲା ପାକିସ୍ତାନ। ଉଭୟଙ୍କୁ ମୁକ୍ତ କରାଯିବା ପରେ ଅନେକ ତଥ୍ୟ ସାମ୍ନାକୁ ଆସିଛି।

ଦୁଇ କର୍ମଚାରୀଙ୍କୁ ବନ୍ଧକ ରଖି ନିର୍ଯାତନା ଦିଆଯାଇଥିଲା। ସନ୍ଧ୍ୟାରେ ଉଭୟଙ୍କୁ ଛାଡ଼ି ଦିଆଯାଇଥିଲେ ମଧ୍ୟ ସେମାନଙ୍କର ଅବସ୍ଥା ଅତ୍ୟନ୍ତ ଗୁରୁତର ଥିଲା। ଇନ୍‌ଫର୍ମେସନ ପାଇଁ ଉଭୟଙ୍କୁ ନିସ୍ତୁକ ମାଡ଼ ଦିଆଯାଇଥିଲା।  ଯନ୍ତ୍ରଣାରେ ଛଟପଟ ହୋଇ ଉଭୟେ ଯେତେବେଳେ ପାଣି ମାଗିଥିଲେ, ସେମାନଙ୍କୁ ଅସନା ପାଣି ପିଇବାକୁ ଦିଆଯାଇଥିଲା। ଜାତୀୟ ଗଣମାଧ୍ୟମ ସୂତ୍ରରୁ ମିଳିଥିବା ତଥ୍ୟ ଅନୁସାରେ, ଉଭୟଙ୍କୁ ତାଙ୍କର ଦାୟିତ୍ୱ ଏବଂ ହାଇ କମିଶନର ସମସ୍ତ କର୍ମଚାରୀଙ୍କ କାମ ବିଷୟରେ ପଚାରିଥିଲେ।

ତେବେ ପୂରା ଘଟଣାରୁ ଯାହା ଜଣାପଡେ, ସମ୍ପୂର୍ଣ୍ଣ ମିଶନ ପୂର୍ବ ଯୋଜନା ମୁତାବକ କରାଯାଇଥିଲା। ସୋମବାର ସକାଳ ୮.୩୦ରେ ଉଭୟଙ୍କୁ ଦୂତାବାସ ନିକଟରେ ଥିବା ପେଟ୍ରୋଲ ପମ୍ପ ନିକଟରୁ ଉଠାଇ ନିଆଯାଇଥିଲା। ୬ଟି ଗାଡ଼ିରେ ହତିଆର ନେଇ ପ୍ରାୟ ୧୫ରୁ ୧୬ ଜଣ ଲୋକ ଆସିଥିଲେ। କର୍ମଚାରୀଙ୍କ ହାତ ବାନ୍ଧି ଦେବା ସହ ସେମାନଙ୍କର ଆଖିରେ ପଟ୍ଟି ବାନ୍ଧି ଦେଇଥିଲେ। ବାଡ଼ିରେ ଉଭୟଙ୍କୁ ପିଟୁଥିଲେ।

ସେଠାରୁ ଫେରିବା ପରେ ଉଭୟ ଚାଲି ପାରୁଥିଲେ କିନ୍ତୁ ଶରୀରର ଅନେକ ସ୍ଥାନରେ ମାଡର ଚିହ୍ନ ଥିଲା। ଅବଶ୍ୟ ମେଡିକାଲ ଯାଞ୍ଚ ପରେ କୌଣସି ପ୍ରାଣଘାତି ମାଡ ଦିଆଯାଇଥିବା ଜଣାପଡ଼ିନି। ତେବେ ଇସ୍‌ଲାମବାଦ ପୋଲିସ ଦୁଇ କର୍ମଚାରୀଙ୍କୁ ପୁରା ଫସାଇବା ଉଦ୍ଦେଶ୍ୟରେ ଯୋଜନା ପ୍ରସ୍ତୁତ କରି ରଖିଛନ୍ତି। ଉଭୟଙ୍କ ନାମରେ ଏକ FIR ଦାଏର କରାଯାଇଛି, ଯେଉଁଥିରେ ଉଲ୍ଲେଖ ରହିଛି ସେମାନଙ୍କ ଗାଡିରୁ ବିଦେଶୀ ମୁଦ୍ରା ମିଳିଥିଲା ଯାହାର ମୂଲ୍ୟ  ୧୦ ହଜାର ପାକିସ୍ତାନୀ ଟଙ୍କା।

ଅନ୍ୟପକ୍ଷେ ପାକିସ୍ତାନ ମିଡିଆ ଦାବି କରିଛି, ଭାରତୀୟ କର୍ମଚାରୀଙ୍କ କାର ଦୁର୍ଘଟଣା ମାମଲାରେ ସଂପୃକ୍ତ ଅଛି। ଅପହର୍ତ୍ତାମାନେ ତାଙ୍କୁ ଜବରଦସ୍ତ କରାଇ କ୍ୟାମେରା ସାମ୍ନାରେ ଏହା କୁହାଇଛନ୍ତି।

ଯାହା ବି ହେଉ,୨ କର୍ମଚାରୀଙ୍କୁ ଫେରାଇବାକୁ ପାକିସ୍ତାନକୁ ଭାରତ ସରକାର କଡ଼ା ଚେତାବନୀ ଦେଇଥିଲେ। ଚେତାବନୀ ପରେ ଇସଲାମବାଦ ସ୍ଥିତ ଭାରତୀୟ ଦୂତାବାସଠାରୁ ୨ କିଲୋମିଟର ଦୂରରେ ଥିବା ପୋଲିସ ଷ୍ଟେସନରେ ୨ ଅଧିକାରୀଙ୍କୁ ରାସ୍ତା ଅଟକ ରଖାଯାଇଥିବା ପାକିସ୍ତାନ ଜଣାଇଥିଲା

 

You might also like