ବିବାଦୀୟ ଲିପୁଲେଖରେ ସେନା ମୁତୟନ କଲା ଚୀନ

ଡେରାଡୁନ୍‌: ଉତ୍ତରାଖଣ୍ଡ ଲିପୁଲେଖ ବିବାଦକୁ ନେଇ ଭାରତ-ନେପାଳ ମଧ୍ୟରେ ଉତ୍ତେଜନା ଲାଗି ରହିଥିବାବେଳେ ଏହି ଅଞ୍ଚଳରେ ଚୀନ ଏବେ ଅଧିକ ସଂଖ୍ୟକ ସୈନ୍ୟ ମୁତୟନ କରିଥିବା ଦେଖିବାକୁ ମିଳିଛି। ସ୍ଥିତି ଉପରେ ଭାରତ ତୀକ୍ଷ୍‌ଣ ନଜର ରଖିଛି।

ମିଳିଥିବା ସୂଚନା ଅନୁଯାୟୀ, ଏହି ଅଞ୍ଚଳରେ ଚୀନ ୧୫୦ ଲାଇଟ୍‌ କମ୍ବାଇନ୍‌ଡ ଆର୍ମ ବ୍ରିଗ୍ରେଡ୍‌ ମୁତୟନ କରିଛି। ପ୍ରାୟ ୨ ସପ୍ତାହ ପୂର୍ବରୁ ତିବ୍ବତ ପାଖ ଲିପୁଲେଖ ଇଲାକାରେ ଚୀନ ଏହି ସେନା ମୁତୟନ କରିଛି। ସୀମା ରେଖାର ୧୦ କିମି ଅଞ୍ଚଳରେ ଏହି ସେନା ମୁତୟନ କରାଯାଇଛି। ଏହା ପୂର୍ବରୁ ଅର୍ଥାତ୍‌ ଜୁଲାଇ ମାସରେ ମଧ୍ୟ ଚୀନ ଏହି ଅଞ୍ଚଳରେ ପ୍ରାୟ ୧୦୦୦ ସେନା ମୁତୟନ କରିଥିଲା। ସେତିକି ନୁହେଁ, ଚୀନ ପିଏଲଏ ପକ୍ଷରୁ ଏଠାରେ ଏକ ସ୍ଥାୟୀ କ୍ୟାମ୍ପ ତିଆରି କରିଛନ୍ତି। ୧୫ ଦିନ ପୂର୍ବରୁ ଏଠାରେ ୨୦୦୦ ସୈନ୍ୟ ମୁତୟନ କରିଛି ଚୀନ।

ସୂଚନାଥାଉ କି ଭାରତ-ନେପାଳ-ଚୀନ ମଝିରେ ଉତ୍ତରାଖଣ୍ଡର କଳାପାଣି ଘାଟି ପାଖରେ ଲିପୁଲେଖ ଅବସ୍ଥିତ। ଲିପୁଲେଖ ଝିଲ୍‌ ନିକଟର  ୧୭, ୦୦୦ ଫୁଟ ଉଚ୍ଚରେ ଭାରତ ସଡକ ନିର୍ମାଣ କରିବା ପରେ ନୂଆଦିଲ୍ଲୀ-କାଠମାଣ୍ଡୁ ମଧ୍ୟରେ ଉତ୍ତେଜନା ଦେଖିବାକୁ ମିଳିଛି। କାରଣ କାଠମାଣ୍ଡୁ ଏହି ଇଲାକାକୁ ନିଜର ବୋଲି କହିବା ସହ ନିଜ ଅଧିକାର ଦାବି କରିଛି। ଏପରିକି ଏହି ଇଲାକାକୁ ନିଜ ମାନଚିତ୍ରରେ ସାମିଲ କରାଇ ନେଇଛି। ନେପାଳର ଏପରି ଉଦ୍ୟମକୁ ଭାରତ ବିରୋଧ କରିଛି।  ଯାହା ବି ହେଉ ଭାରତ ପକ୍ଷରୁ ନିର୍ମିତ ହେଉଥିବା ଏହି ରାସ୍ତା ଯୋଗୁ ସଡକ ପଥରେ କୈଳାସ ମାନସରୋବର ଯାତ୍ରା କରୁଥିବା ତୀର୍ଥଯାତ୍ରୀଙ୍କ ପାଇଁ ସୁବିଧା ହେବ ।

ଅନ୍ୟପକ୍ଷେ ଲଦାଖର ପ୍ରକୃତ ନିୟନ୍ତ୍ରଣ ରେଖା (LAC) ନିକଟରେ ଭାରତ-ଚୀନ ମୁହାଁମୁହିଁ ସ୍ଥିତିରେ ଅଛନ୍ତି। ସୀମା ବିବାଦକୁ ନେଇ ଦୁଇ ଦେଶ ମଧ୍ୟରେ ଉତ୍ତେଜନା ଲାଗି ରହିଥିବାବେଳେ ସୀମାନ୍ତୀରେ ଉଭୟ ଦେଶ ପକ୍ଷରୁ ସେନା ମୁତୟନ କରାଯାଇଛି।

You might also like