ସୀମାରେ ସୈନ୍ୟ ପ୍ରତ୍ୟାହାର ପାଇଁ ଆଜି ଭାରତ-ଚୀନ ମଧ୍ୟରେ ପଞ୍ଚମ ପାଳି ବୈଠକ

ନୂଆଦିଲ୍ଲୀ: ଗୋଗ୍ରା ଓ ପାଙ୍ଗୋଙ୍ଗ ଟିଏସ୍‌ଓ ଅଞ୍ଚଳରେ ସେନା ପ୍ରତ୍ୟାହାର ପାଇଁ ଆଜି ଭାରତ ଓ ଚାଇନା ମଧ୍ୟରେ ପଞ୍ଚମ ଥର ପାଇଁ କମାଣ୍ଡର ସ୍ତରୀୟ ଆଲୋଚନା ହେବ। ଏହି ଦୁଇ ଅଞ୍ଚଳରେ ଏପର୍ଯ୍ୟନ୍ତ ଦୁଇ ଦେଶ ସେନା ପ୍ରତ୍ୟାହାର କରିନାହାଁନ୍ତି।

ଏଥିପାଇଁ ଚାଇନା ତରଫରୁ ମୋଲଡୋରେ ଏହି ବୈଠକର ଆୟୋଜନ ହୋଇଛି। ପାଙ୍ଗୋଙ୍ଗ୍‌ ହ୍ରଦରେ ସୈନ୍ୟ ପ୍ରତ୍ୟାହାର ଘଟଣା ଏହି ବୈଠକର ମୁଖ୍ୟ ବିଷୟବସ୍ତୁ ରହିବ ବୋଲି ସୂଚନା ରହିଛି। ପୂର୍ବ ଲଦାଖର ପାଙ୍ଗୋଙ୍ଗ ଅଞ୍ଚଳରେ ଫିଙ୍ଗର ୫ ଓ ୮ ମଧ୍ୟରେ ଚାଇନା ତାର ସେନା ମୁତୟନ କରିଛି। ସେହିଭଳି ଗୋଗ୍ରା ଅଞ୍ଚଳର ପଏଣ୍ଟ ୧୭Aରେ ମଧ୍ୟ ସୈନ୍ୟ ପ୍ରତ୍ୟାହାର ହୋଇନାହିଁ। ତେଣୁ ପଞ୍ଚମ ପାଳି ବୈଠକରେ ଏ ବିଷୟରେ ବି ଆଲୋଚନା ହୋଇପାରେ।

ପୂର୍ବରୁ ଜୁଲାଇ ୧୪ରେ ମଧ୍ୟ ଏସମ୍ପର୍କରେ ଆଲୋଚନା କରିବା ପାଇଁ ଉଭୟ ପକ୍ଷରୁ ବୈଠକ ବସିଥିଲା। କିନ୍ତୁ ସେଥିରେ କିଛି ସୁଫଳ ମିଳିନଥିଲା। ଉଭୟ ଦେଶ ପରସ୍ପରର ସୈନ୍ୟ ପ୍ରତ୍ୟାହାର କଲେ ନାହିଁ। ଏବେ ଆଜି ପୁଣି ଏକ ବୈଠକ ବସିବ।

ପାଙ୍ଗୋଙ୍ଗରେ ସୈନ୍ୟ ପ୍ରତ୍ୟାହାର ନେଇ ଚାଇନା ଏପର୍ଯ୍ୟନ୍ତ ଚୁପ୍ ରହିଥିବା ବେଳେ ବେଳେ ଗଲୱାନ, ହଟ୍‌ସ୍ପ୍ରିଙ୍ଗ ଏବଂ ଗୋଗ୍ରା ଅଞ୍ଚଳରେ ସୈନ୍ୟ ଉଠାଇ ନିଆଯାଇଥିବା ସୂଚନା ଦେଇଥିଲା। ଏ ନେଇ ଚୀନ ବିଦେଶ ମନ୍ତ୍ରାଳୟର ପ୍ରବକ୍ତା ସୂଚନା ଦେଇଥିଲେ। କିନ୍ତୁ ଗୋଗ୍ରା ଓ ପାଙ୍ଗୋଙ୍ଗ ଲେକ୍‌ ଅଞ୍ଚଳରେ ଏବେବି ସୈନ୍ୟ ହଟିନଥିବା ସୂଚନା ମିଳିଛି।

You might also like