ପଣ୍ଡ ହେଲା ବିମାନ ଅପହରଣ ଉଦ୍ୟମ

ଢାକା: ପଣ୍ଡ ହେଲା ବିମାନ ଅପହରଣ। ବାଂଲାଦେଶରୁ ଦୁବାଇ ଅଭିମୁଖେ ଯାଉଥିବା ଏକ ବିମାନ ଅପହରଣ ଉଦ୍ୟମକୁ ସୁରକ୍ଷାକର୍ମୀମାନେ ପଣ୍ଡ କରିଛନ୍ତି। ତେବେ ସୁରକ୍ଷାକର୍ମୀଙ୍କ ଗୁଳିରେ ସନ୍ଦିଗ୍ଧ ବ୍ୟକ୍ତି ଯିଏକି ଅପହରଣ ପାଇଁ ଉଦ୍ୟମ କରିଥିଲେ ତାଙ୍କର ମୃତ୍ୟୁ ଘଟିଥିବା ସୂଚନା ମିଳିଛି।

ସୂଚନା ଅନୁସାରେ, ଗତକାଲି ବାଂଲାଦେଶ ଏୟାରଲାଇନ୍ସର BG-147 ବିମାନକୁ ଅପହରଣ କରିବାକୁ ଜଣେ ବନ୍ଧୁକଧାରୀ ଉଦ୍ୟମ କରିଥିଲେ। ଏହା ଢାକାରୁ ଭାୟା ଚତ୍ତୋଗ୍ରାମ୍‌ ଦେଇ ଦୁବାଇ ଅଭିମୁଖେ ଯାତ୍ରା କରୁଥିବା ସମୟରେ ଏହି ଘଟଣା ଘଟିଥିଲା । ଫଳରେ ଚତ୍ତୋଗ୍ରାମ୍‌ ବିମାନବନ୍ଦରରେ ଗତକାଲି ଅପରାହ୍ଣ ପାଖାପଖି ୫ଟା ୪୦ ମିନିଟ୍‌ରେ ବିମାନକୁ ଜରୁରୀ ଅବତରଣ କରାଯାଇଥିଲା।

ବିମାନଟି ବିମାନବନ୍ଦରରେ ଜରୁରୀ ଅବତରଣ କରିବା ମାତ୍ରେ ବିମାନଟିକୁ ଚାରିପଟୁ ସୁରକ୍ଷାକର୍ମୀ ଘେରି ଯାଇଥିଲେ। ତା’ ପରେ ବିମାନ ଭିତରେ ପ୍ରବେଶ କରି ବନ୍ଧୁକଧାରୀକୁ କାବୁ କରିବା ସହ ବିମାନରେ ଥିବା ସମସ୍ତ ୧୪୨ ଯାତ୍ରୀଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ।

 

You might also like