‘ଆତଙ୍କବାଦୀଙ୍କ ଭବିଷ୍ୟତ ଉପରେ ଲଢ଼ିଲେ ହିଁ ଆତଙ୍କବାଦର ମୂଳୋତ୍ପାଟନ ହୋଇପାରିବ’

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଆଜି ନ୍ୟାସନାଲ ଇନଭେଷ୍ଟିଗେସନ ଏଜେନ୍ସି (ଏନଆଇଏ)ର ବୈଠକ ବସିଛି। ଏହି ଅବସରରେ ଦେଶର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଯୋଗ ଦେଇ ଆତଙ୍କବାଦ ବିରୋଧରେ ଲଢ଼ିବା ପାଇଁ ନୂଆ ରଣନୀତିର ଆବଶ୍ୟକ ରହିଛି ବୋଲି କହିଛନ୍ତି।

ସେ କହିଛନ୍ତି, ପାକିସ୍ତାନ ସରକାର ଆତଙ୍କବାଦକୁ ନିଜର ଏକ ଅଂଶ କରି ସାରିଛନ୍ତି। ଏବେ ସେହି ଆତଙ୍କବାଦୀ ଭାରତ ବିପକ୍ଷରେ ଲଢ଼ୁଛନ୍ତି। ତେବେ ଭାରତ ଆତଙ୍କବାଦ ବିରୋଧରେ କାର୍ଯ୍ୟାନୁଷ୍ଠାନ ନେବାରେ ସଫଳ ହୋଇଛି।

‘ଏବେ ଆମେ ଆତଙ୍କବାଦୀଙ୍କ ବର୍ତ୍ତମାନ ସ୍ଥିତି ଉପରେ ଲଢ଼ୁଛୁ। ହେଲେ ତାଙ୍କ ଭବିଷ୍ୟତ ଉପରେ ଲଢ଼ିଲେ ହିଁ ଆତଙ୍କବାଦର ମୂଳୋତ୍ପାଟନ ହୋଇପାରିବ ବୋଲି’ ଅଜିତ ଡୋଭାଲ କହିଛନ୍ତି। ତେଣୁ ତାଙ୍କ ବିଚାରଧାରା ଉପରେ ଲଢ଼ିବା ଜରୁରୀ ବୋଲି ସେ କହିଛନ୍ତି।

ଆତଙ୍କବାଦ ବିରୋଧରେ ଦେଶର ସେନା, ଏନଆଇଏ, ଆଇବି, ର’ ଭଳି ଅଲଗା ଅଲଗା ସଂସ୍ଥା କାମ କରୁଛନ୍ତି। ହେଲେ ରାଜ୍ୟରେ ଥିବା ଗୁଇନ୍ଦା ସଂସ୍ଥା ଆତଙ୍କବାଦୀଙ୍କୁ ପ୍ରଥମେ ସାମ୍ନା କରୁଛନ୍ତି। ଜମ୍ମୁ କଶ୍ମୀରରେ ଥିବା ଆତଙ୍କବାଦୀ ସଂଗଠନ ଏବେ ଭୁଶୁଡ଼ି ପଡ଼ିଛି। ଆତଙ୍କବାଦୀଙ୍କ ମନି ଲଣ୍ଡରିଂ ମାମଲା ଉପରେ ଏନଆଇଏ କଡ଼ା ପଦକ୍ଷେପ ଗ୍ରହଣ କରିଛି। ଯାହାକି ଏନଆଇଏର ସଫଳତା ବୋଲି ଅଜିତ ଡୋଭାଲ କହିଛନ୍ତି।

You might also like