ଜବତ ହେଲା ସାତ କୋଟିର ସୁନା

ନୂଆଦିଲ୍ଲୀ: ୭ କୋଟିର ସୁନା ଜବତ କଲା ଡାଇରେକ୍ଟୋରେଟ୍‌ ଅଫ୍‌ ରେଭିନ୍ୟୁ ଇଣ୍ଟେଲିଜେନ୍ସ(ଡିଆର୍‌ଆଇ)। ଏହି ସୁନା ମ୍ୟାନ୍‌ମାରରୁ ଭାରତକୁ ଚାଲାଣ ହେଉଥିଲା। ତିନିଟି ରାଜ୍ୟରେ ସର୍ଚ୍ଚ ଅପରେସନ କରି ଏହି ସୁନା ସବୁ ଜବତ କରାଯାଇଛି। ଏଥିସହିତ ୬ ଜଣ ଗିରଫ ମଧ୍ୟ ହୋଇଛନ୍ତି। ଏନେଇ ଆଜି ସୂଚନା ଦେଇଛି ଡିଆର୍‌ଆଇ।

ସୁନାସବୁ ମ୍ୟାନ୍‌ମାରରୁ ଭାରତକୁ ଅଣାଯିବାପରେ ବସ୍ ଯୋଗେ ଗୌହାଟି, ସିଲିଗୁଡ଼ି ଏବଂ ପାଟନାରୁ ନୂଆଦିଲ୍ଲୀକୁ ଅଣାଯାଉଥିଲା। ଏହି ସମୟରେ ସୁନା ଜବତ କରାଯାଇଥିବା ଡିଆରଆଇର ଦିଲ୍ଲୀ ୟୁନିଟ କହିଛି।

କରୋନା କାରଣରୁ ସ୍ମଗଲରମାନେ ବସଦେଇ ସୁନା ଚାଲାଣ କରୁଥିଲେ। ଗୌହାଟି ଏବଂ ପାଟନାରୁ ଦୁଇଜଣ ବ୍ୟକ୍ତି ଦିଲ୍ଲୀର ଜେୱାର ଟୋଲ ପ୍ଲାଜା ନିକଟରେ ଓହ୍ଲାଇଲା ପରେ ଡିଆରଆଇ ସେମାନଙ୍କୁ ଗିରଫ କରିଥିଲା। ସେମାନଙ୍କଠାରୁ ୪.୯୮ କିଲୋଗ୍ରାମ ସୁନା ଜବତ କରାଯାଇଥିଲା। ସେହିପରି ପଶ୍ଚିମବଙ୍ଗର ସିଲିଗୁଡ଼ି ବସ୍‌ ଷ୍ଟେସନରେ ଦୁଇଜଣଙ୍କଠାରୁ ପୁଣି ୪.୯୮ କିଲୋଗ୍ରାମ ସୁନା ଜବତ କରାଯାଇଥିବାବେଳେ ପାଟନାରୁ ୩.୯୮ କିଲୋଗ୍ରାମ ସହ ମୋଟ ୧୪ କିଲୋଗ୍ରାମ ସୁନା ଜବତ କରାଯାଇଛି। ଏହାର ଆନୁମାନୁକ ମୂଲ୍ୟ ୭ କୋଟି ଟଙ୍କା ହେବ ବୋଲି ଡିଆରଆଇ କହିଛି।

You might also like