୩ କରୋନା ରୋଗୀଙ୍କୁ ଭଲ କଲେ ଭାରତୀୟ ଡାକ୍ତର
image credit-representational imageଜୟପୁର: ମହାମାରୀ କରୋନା ଭାଇରସରୁ କିପରି ନିଜକୁ ବଞ୍ଚେଇବେ ସେ ନେଇ ବିଶ୍ୱବାସୀ ଏକ ପ୍ରକାର ସଂଘର୍ଷ ଚଳାଇଛନ୍ତି। ତା ଏପରି ବିପତ୍ତି ଭିତରେ ଗୋଟିଏ ଗୋଟିଏ ଖବର ଅନେକ ଖୁସିର ବର୍ତ୍ତା ନେଇ ଆସୁଛି। ଏମିତି ଏକ ଖବର ଭାରତର ଜୟପୁରରୁ ଆସିଛି। ରାଜସ୍ଥାନର ଜୟପୁରରେ କରୋନା ଭାଇରସରେ ଆକ୍ରାନ୍ତ ହୋଇଥିବା ୪ ଜଣ ରୋଗୀଙ୍କ ମଧ୍ୟରୁ ୩ ଜଣଙ୍କୁ ଭାରତୀୟ ଡାକ୍ତର ମେଡିସିନ୍ ଦ୍ୱାରା ଭଲ କରି ପାରିଛନ୍ତି।
ମିଳିଥିବା ସୂଚନା ଅନୁଯାୟୀ, ସୱାଇ ମାନସିଂ ହସ୍ପିଟାଲରେ ୪ ଜଣ କରୋନା ଆକ୍ରାନ୍ତ ଚିକିତ୍ସିତ ହେଉଥିଲେ। କରୋନା ପ୍ରତିକାର ପାଇଁ କୌଣସି ଔଷଧ ବାହାରି ନ ଥିବାବେଳେ ରୋଗୀଙ୍କୁ ଭଲ କରିବା ପାଇଁ ଡାକ୍ତରମାନେ ସେମାନଙ୍କୁ ମ୍ୟାଲେରିଆ, ସ୍ୱାଇନ ଫ୍ଲୁ ଓ ଏଚଆଇଭି ରୋଗ ପାଇଁ ବ୍ୟବହୃତ ହେଉଥିବା ଔଷଧଗୁଡ଼ିକୁ ମିଶାଇ ଏକ ସ୍ୱତନ୍ତ୍ର ଡୋଜ ତିଆରି କରି ରୋଗୀଙ୍କ ଶରୀରରେ ବ୍ୟବହାର କରିଥିଲେ। ଏହାପରେ ୪ ଜଣଙ୍କ ମଧ୍ୟରୁ ୩ ଜଣ ସୁସ୍ଥ ହୋଇଥିବା ଜଣାପଡ଼ିଛି।
ଅନ୍ୟ ୨୩ ଇଟାଲୀ ପର୍ଯ୍ୟଟକଙ୍କ ସହ ୬୯ ବର୍ଷୀୟ ଆଣ୍ଡ୍ରେ କାର୍ଲି ଓ ତାଙ୍କ ପତ୍ନୀ ଭାରତର ଜୟପୁର ବୁଲିବାକୁ ଆସିଥିଲେ। ଏହି ସମୟରେ ସେମାନେ କାରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ତେବେ ଉଭୟ ଚିକିତ୍ସା ପରେ ସୁସ୍ଥ ହୋଇଛନ୍ତି। ତାଙ୍କର ନମୁନା ପରୀକ୍ଷା କରିବା ବେଳେ ନେଗେଟିଭ ଆସିଛି।
ସେହିପରି ରାଜସ୍ଥାନର ରାଜା ପାର୍କ ନିକଟରେ ରହୁଥିବା ଜଣେ ବ୍ୟକ୍ତିଙ୍କ ଶରୀରରେ କରୋନା ଭୂତାଣୁ ଠାବ ହୋଇଥିଲା। ସେ ଦୁବାଇରୁ ଫେରିଥିଲେ। ହେଲେ ଏବେ ସେ ମଧ୍ୟ ସୁସ୍ଥ ହୋଇ ଯାଇଛନ୍ତି।