ମୁମ୍ବାଇ: ସୋସିଆଲ ମିଡ଼ିଆରେ ନିଜ ଝିଅର ପ୍ରଥମ ଫଟୋ ସେୟାର କଲେ ଅଭିନେତ୍ରୀ ଅନୁଷ୍କା ଶର୍ମା। ସେୟାର ହୋଇଥିବା ଫଟୋରେ ବିରାଟ ଓ ଅନୁଷ୍କା ଝିଅକୁ କୋଳରେ ଧରିଥିବା ବେଳେ ବେଶ୍ ଖୁସି ନଜର ଆସିଛନ୍ତି। ଫଟୋ ସେୟାର କରି ଅନୁଷ୍କା ଝିଅର ନାଁ ‘ଭମିକା’ ରଖିଥିବା ଫ୍ୟାନ୍ସଙ୍କୁ ଜଣାଇଛନ୍ତି। ତେବେ ଏହି ଫଟୋ ସେୟାର କରିବା ମାତ୍ର ୫ ମିନିଟ୍ ସମୟ ମଧ୍ୟରେ ଲକ୍ଷେରୁ ଅଧିକ ଲାଇକ୍ ମିଳିଛି। ପ୍ରଶଂସକମାନେ ବିରାଟ ଓ ଅନୁଷ୍କାଙ୍କୁ ଶୁଭେଚ୍ଛା ମଧ୍ୟ ଜଣାଇଛନ୍ତି।
ଜାନୁଆରୀ ୧୧ ତାରିଖରେ ଅନୁଷ୍କା ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ। ଆଉ ବିରାଟ ନିଜେ ସୋସିଆଲ ମିଡ଼ିଆରେ ଏ ଖୁସି ଖବର ଜଣାଇଥିଲେ। ବିରାଟ ଲେଖିଥିଲେ, “ଆଜି ଅପରାହ୍ନରେ ଆମର ଝିଅ ହେଇଛି, ଏ ଖୁସି ଖବର ସେୟାର କରି ଆମକୁ ବହୁତ ଖୁସି ଅନୁଭବ ହେଉଛି। ଆପଣମାନଙ୍କ ସ୍ନେହ ଓ ଶୁଭକାମନା ପାଇଁ ହୃଦୟରୁ ଧନ୍ୟବାଦ। ଅନୁଷ୍କା ଓ ଝିଅ ଉଭୟ ସୁସ୍ଥ ଅଛନ୍ତି।” ଏଥିସହ ଝିଅ ଜନ୍ମ ପରେ ବିରାଟ ଓ ଅନୁଷ୍କା ସମସ୍ତ ଫଟୋଗ୍ରାଫରଙ୍କୁ ଫଟୋ ନ ଉଠେଇବାକୁ ଅପିଲ କରିଥିଲେ। ଆପଣମାନେ ଆମ ପ୍ରାଇଭେସିକୁ ସମ୍ମାନ ଦେବେ ବୋଲି ଆଶା କରୁଛୁ ବୋଲି ସେ ଲେଖିଥିଲେ।
ବିରାଟ କୋହଲିଙ୍କ ଭାଇ ବିକାଶ କୋହଲି ନିଜ ଇନଷ୍ଟାଗ୍ରାମରେ ବିରୁଷ୍କାଙ୍କ ଝିଅର ପ୍ରଥମ ଫଟୋକୁ ସେୟାର ମଧ୍ୟ କରିଥିଲେ। ଏହି ଫଟୋରେ କେବଳ କୁନି ଝିଅର ଗୋଡ ଦୁଇଟି ହିଁ ଦେଖିବାକୁ ମିଳିଥିଲା। ଏହି ଫଟୋକୁ ସେୟାର କରି ବିକାଶ କହିଥିଲେ, ଘରକୁ ଆଞ୍ଜେଲ ତଥା ନହ୍ନି ପରୀ ଆସିଛନ୍ତି । ଆମ ଘରକୁ ଆଞ୍ଜେଲ ଆସିଥିବାରୁ ଆମ ଖୁସି ଏବେ ଦ୍ୱିଗୁଣିତ ହୋଇଯାଇଛି।
ସେହିପରି କୋହଲିଙ୍କ ଭଉଣୀ ଭାୱନା କୋହଲି ମଧ୍ୟ ଝିଅର ପାଦ ଫଟୋକୁ ଶେଆର କରି ପିଉସୀ ବନିଯାଇଥିବାରୁ ନିଜକୁ ଗର୍ବିତ ମନେ କରୁଥିବା କହିଥିଲେ । ଶେଆର କରିଥିବା ଫଟୋରେ ୱେଲକମ୍ ଆଞ୍ଜେଲ ବୋଲି ମଧ୍ୟ ଲେଖିଥିଲେ। ବିରାଟ ଓ ଅନୁଷ୍କା ୨୦୧୭ ଡିସେମ୍ବର ୧୧ରେ ବିବାହ କରିଥିଲେ। ଏହାପରେ ୨୦୨୦ ଜାନୁଆରୀ ୧୧ରେ ତାଙ୍କ ଘରକୁ କନ୍ୟା ସନ୍ତାନ ଆସିଥିଲା।