କରୋନା: ଦେଶରେ ମୃତ୍ୟୁ ସଂଖ୍ୟା ୯ ଛୁଇଁଲା, ଦିନକରେ ୭୫ ନୂଆ ଆକ୍ରାନ୍ତ ଚିହ୍ନଟ

ନୂଆଦିଲ୍ଲୀ: ରବିବାର ଜନତା କର୍ଫ୍ୟୁକୁ ମାନିବା ପରେ ସୋମବାର ଘରେ ରହିବାକୁ ଯେମିତି ଲୋକେ ପ୍ରସ୍ତୁତ ନ ଥିଲେ। ସୋମବାର  ଅଧିକାଂଶ ଲୋକ ଘରୁ ବାହାରି ଆସିଥିଲେ। ରାସ୍ତାଘାଟ ଥିଲା ଚଳଚଞ୍ଚଳ। ଏହାକୁ ଦେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍‌ବେଗ ପ୍ରକାଶ କରିବା ସହ  ଲକ୍‌ଡାଉନ୍‌ କଡାକଡି ପାଳନ କରିବାକୁ ନିବେଦନ କରିଥିଲେ। ଏଥିସହ ରାଜ୍ୟ ସରକାରମାନେ ମଧ୍ୟ କଡା ପଦକ୍ଷେପ ନେଇଥିଲେ।  ନିୟମ ନ ମାନିଲେ କାର୍ଯ୍ୟାନୁଷ୍ଠାନ ପାଇଁ  ନିର୍ଦ୍ଦେଶ ଦେଇଥିଲେ ।

ପରିସ୍ଥିତିକୁ ଦେଖି  କରୋନା ଭାଇରସ୍ ସଂକ୍ରମଣକୁ ରୋକିବା ଲାଗି ରାଜଧାନୀ ଦିଲ୍ଲୀ ସମେତ ୩୦ଟି ରାଜ୍ୟ ସମ୍ପୂର୍ଣ୍ଣ ଲକ୍‌ଡାଉନ୍ ଘୋଷଣା କରାଯାଇଛି। ମୋଟ ୫୪୮ଟି ଜିଲ୍ଲାରେ ଲକ୍‌ଡାଉନ୍ କରାଯାଇଛି । ଏଥିରେ କରୋନା ଆକ୍ରାନ୍ତ ଚିହ୍ନଟ ହୋଇଥିବା ୮୦ଟି ଜିଲ୍ଲା ମଧ୍ୟ ଅନ୍ତର୍ଭୁକ୍ତ ।

କେବଳ ମିଜୋରାମ ଓ ସିକ୍କିମ ଲକ୍‌ଡାଉନରୁ ବାଦ୍ ଅଛନ୍ତି । ଏଥିସହ ସୀମାନ୍ତବର୍ତ୍ତୀ ସମସ୍ତ ୧୦୭ ଚେକ୍ ପୋଷ୍ଟରେ କଟକଣା ଲଗାଇଛନ୍ତି କେନ୍ଦ୍ର ସରକାର । ବିମାନବନ୍ଦର, ରେଳ ଷ୍ଟେସନ୍, ସାମୁଦ୍ରିକ ବନ୍ଦର, ନଦୀ ପଥ ଓ ସ୍ଥଳଭାଗ ସୀମାରେ ଥିବା ଦେଶର ସମସ୍ତ ଇମିଗ୍ରେସନ୍ ଚେକ୍ ପୋଷ୍ଟ ବନ୍ଦ କରି ଦିଆଯାଇଛି । ଅନ୍ୟପଟେ ପଞ୍ଜାବ, ମହାରାଷ୍ଟ୍ର ଓ ଚଣ୍ଡିଗଡ଼ରେ କର୍ଫ୍ୟୁ ଲାଗୁ କରାଯାଇଛି। ଅନେକ ରାଜ୍ୟ ସେମାନଙ୍କ ସୀମା ସିଲ୍ କରିଦେଇଛନ୍ତି।

ଅନ୍ୟପକ୍ଷେ ଭାରତରେ କରୋନା  ମୃତ୍ୟୁ ସଂଖ୍ୟା ୯ରେ ପହଞ୍ଚିଛି। ହିମାଚଳପ୍ରଦେଶରେ ଜଣେ ଆମେରିକା ଫେରନ୍ତା ତିବ୍ବତୀୟଙ୍କୁ ମିଶାଇ ମୋଟ ୯ ଜଣଙ୍କର ମୃତ୍ୟୁ ଘଟିଛି। ଅନ୍ୟପକ୍ଷରେ ସୋମବାର ୭୫ଟି ନୂଆ ମାମଲା ସାମ୍ନାକୁ ଆସିବା ପରେ କରୋନା ଆକ୍ରାନ୍ତଙ୍କ ସଂଖ୍ୟା ୪୩୩କୁ ବୃଦ୍ଧି ପାଇଛି।  ଦେଶର ବିଭିନ୍ନ ସ୍ଥାନରୁ ଆସିଥିବା ରିପୋର୍ଟ ଆଧାରରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି।

ହିମାଚଳପ୍ରଦେଶରେ ଜଣେ ଆମେରିକା ଫେରନ୍ତାଙ୍କର ମୃତ୍ୟୁ ଘଟିଥିବା ନେଇ ପୂର୍ବରୁ ସୂଚନା ଥିଲେ ହେଁ, ଏହା କରୋନାଜନିତ କି ନା ତାହା ପୂର୍ବରୁ ସ୍ପଷ୍ଟ ହୋଇନଥିଲା। ତାଙ୍କର ଶ୍ୱାସ ପ୍ରଶ୍ୱାସ ଜନିତ ସମସ୍ୟା ଥିବା କୁହାଯାଇଥିଲା। ରିପୋର୍ଟ ଆସିବା ଯାଏ ଏହା କରୋନା ଜନିତ ମୃତ୍ୟୁ କି ନା ତାହା ସ୍ପଷ୍ଟ କରିହେବନି ବୋଲି କାଙ୍ଗରା ଡେପୁଟୀ କମିଶନର ରାକେଶ କୁମାର ପ୍ରଜାପତି କହିଥିଲେ। ପରେ ଏହା କରୋନା ଜନିତ ମୃତ୍ୟୁ ବୋଲି କିଛି ଜାତୀୟ ଗଣମାଧ୍ୟମ ଏହା ସ୍ପଷ୍ଟ କରିଛନ୍ତି।
ଅନ୍ୟପକ୍ଷେ କୋଲକାତାରେ  ଜଣେ ୫୫ ବର୍ଷ ବୟସ୍କ ବ୍ୟକ୍ତିଙ୍କର ଗତକାଲି କରୋନାରେ ମୃତ୍ୟୁ ଘଟିଛି। ସେ  ନିକଟରେ ଇଟାଲୀରୁ ଫେରିଥିଲେ। ତାଙ୍କ ଶରୀରରେ କରୋନା ଭୂତାଣୁ ଥିବା ସନ୍ଦେହରେ ତାଙ୍କ କୋଲକାତାର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା।  ପରୀକ୍ଷା ପରେ ତାଙ୍କ ଶରୀରରେ କରୋନା ଭୂତାଣୁ ଠାବ ହୋଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ଗତକାଲି ମୃତ୍ୟୁ ଘଟିଥିଲା। କୋଲକାତାରେ କରୋନା ପ୍ରଥମ ମୁଣ୍ଡ ନେଇଥିବା ବେଳେ ଭାରତରେ ମୃତ୍ୟୁସଂଖ୍ୟା ୯ରେ ପହଞ୍ଚି ଯାଇଛି।

 

You might also like