ଦିଲ୍ଲୀରେ କଂଗ୍ରେସର ଗୁରୁତ୍ୱପୂର୍ଣ୍ଣ ବୈଠକ

ଲୋକଙ୍କ ସ୍ୱର ହେବାକୁ ଦଳକୁ ଅାହ୍ୱାନ ଦେଲେ ରାହୁଲ

ନୂଆଦିଲ୍ଲୀ : ଆସନ୍ତା ସାଧାରଣ ନିର୍ବାଚନରେ କଂଗ୍ରେସ ଏକାକୀ ନ ଲଢି ମେଣ୍ଟ କରିବ। କିନ୍ତୁ କେଉଁ ଦଳ ସହ ମେଣ୍ଟ ହେବ ଏ ସମ୍ପର୍କରେ ନିଷ୍ପତ୍ତି ନେବେ କଂଗ୍ରେସ ସଭାପତି ରାହୁଲ ଗାନ୍ଧି। ଦିଲ୍ଲୀରେ ହୋଇଥିବା କଂଗ୍ରେସର ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକରେ ଏହି ନିଷ୍ପତ୍ତି ନିଆଯାଇଛି। ନିର୍ବାଚନ ପୂର୍ବରୁ କିମ୍ବା ପରେ କେଉଁ ଦଳ ସହ ମେଣ୍ଟ କରାଯିବ ସେ ସମ୍ପର୍କରେ ମଧ୍ୟ ରାହୁଲ ଗାନ୍ଧି ଚୂଡାନ୍ତ ନିଷ୍ପତ୍ତି ନେବେ।

ଏଥିସହ ନିର୍ବାଚନ ପ୍ରଚାର କମିଟି ଗଠନ ନେଇ ମଧ୍ୟ ରାହୁଲ ନିଷ୍ପତ୍ତି ନେବେ। ଏହି ଅବସରରେ ନିର୍ବାଚନରେ କଂଗ୍ରେସକୁ ଲୋକଙ୍କ ସ୍ୱର ଭାବେ ଭୂମିକା ନିର୍ବାହ କରିବାକୁ କଂଗ୍ରେସକୁ ଆହ୍ୱାନ ଦେଇଛନ୍ତି ଦଳର ସଭାପତି ରାହୁଲ ଗାନ୍ଧି। ଆଜି ଦିଲ୍ଲୀରେ ଦଳର ପରିବର୍ଦ୍ଧିତ କାର୍ଯ୍ୟକାରୀ କମିଟି ବୈଠକରେ ସେ କହିଛନ୍ତି।

ବିଜେପି ଦେଶର ବିଭିନ୍ନ ଅନୁଷ୍ଠାନ, ଦଳିତ, ଆଦିବାସୀ, ଗରିବ ଓ ସଂଖ୍ୟାଲଘୁଙ୍କ ଉପରେ ଆକ୍ରମଣ କରୁଥିବା ବେଳେ କଂଗ୍ରେସର ଦାୟିତ୍ୱ ହେଉଛି ଏହାକୁ ପ୍ରତିହତ କରିବା। ଭାରତର ନିର୍ଯାତିତଙ୍କ ପାଇଁ କାମ କରିବାକୁ କଂଗ୍ରେସ କର୍ମୀଙ୍କୁ ଆହ୍ୱାନ ଦେଇଛନ୍ତି ରାହୁଲ ଗାନ୍ଧି। ନୂଆ କରି ଗଠିତ ହୋଇଥିବା କାର୍ଯ୍ୟକାରୀ କମିଟିକୁ ଅତୀତ, ବର୍ତ୍ତମାନ ଓ ଭବିଷ୍ୟତ ମଧ୍ୟରେ ସେତୁ ବୋଲି ସେ କହିଛନ୍ତି। ସେହିପରି ସୋନିଆ ଗାନ୍ଧି ଓ ମନମୋହନ ସିଂହ ମଧ୍ୟ ମୋଦି ସରକାରକୁ କଡ଼ା ସମାଲୋଚନା କରିଛନ୍ତି। ନୂଆ କାର୍ଯ୍ୟକାରୀ କମିଟି ଗଠନ ହେବା ପରେ କଂଗ୍ରେସରେ ଏହା ପ୍ରଥମ ବୈଠକ ଥିଲା।

You might also like