ସଭାରେ ଯୋଗ ଦେବା ବେଳେ ହଠାତ୍ ଅସୁସ୍ଥ ହୋଇପଡ଼ିଲେ ବିଜେପି ସାଂସଦ ସାଧ୍ୱୀ ପ୍ରଜ୍ଞା

ଭୋପାଳ: ଭୋପାଳରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେବାକୁ ଯାଇ ହଠାତ୍ ଅସୁସ୍ଥ ହୋଇପଡ଼ିଲେ ଭୋପାଳ ଏମ୍‌ପି ସାଧ୍ୱୀ ପ୍ରଜ୍ଞା ଠାକୁର୍‌। ମଙ୍ଗଳବାର ଭୋପାଳରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ଶ୍ରାଦ୍ଧବାର୍ଷିକି ଅବସରରେ ଏକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିବା ପ୍ରଜ୍ଞା ହଠାତ୍ ଅସୁସ୍ଥ ହୋଇପଡ଼ିଛନ୍ତି।

ରବିବାର ଅନ୍ତର୍ଜାତୀୟ ଯୋଗ ଦିବସରେ ଯୋଗ ଦେଇ ନିଜ ଅସୁସ୍ଥତା ପାଇଁ କଂଗ୍ରେସକୁ ଦାୟୀ କରିଥିଲେ ସାଧ୍ୱୀ ପ୍ରଜ୍ଞା। କଂଗ୍ରେସ ଶାସନ ସମୟରେ ନିର୍ଯାତନା ଯୋଗୁ ଆଖିରେ ଜ୍ୟୋତି ହରାଇଥିବା ମଧ୍ୟ ଅଭିଯୋଗ କରିଥିଲେ ପ୍ରଜ୍ଞା ଠାକୁର।

ରାଜ୍ୟ ବିଜେପି ମୁଖ୍ୟାଳୟ ଆୟୋଜିତ ଯୋଗ ଦିବସରେ ଯୋଗ ଦେଇ ସେ ଗଣମାଧ୍ୟମକୁ କହିଥିଲେ, କଂଗ୍ରେସ ଶାସନ ସମୟରେ ଦୀର୍ଘ ୯ ବର୍ଷ ଧରି ନିର୍ଯାତିତ ହେବା ପରେ ମୋ ଆଖିରେ ଓ ମସ୍ତିସ୍କରେ ଫୁଲା ସୃଷ୍ଟି ହୋଇଥିଲା। ଏହାପରେ ଡାହାଣ ଆଖିରେ ମୋର ଦୃଷ୍ଟି ଶକ୍ତି ବାଧାପ୍ରାପ୍ତ ହୋଇଥିଲା। ମାଲେଗାଓଁ ବିସ୍ଫୋରଣ ମାମଲାରେ ଜେଲ୍‌ ଦଣ୍ଡ ଭୋଗିଥିବା ଘଟଣାକୁ ଉଲ୍ଲେଖ କରିଥିଲେ ପ୍ରଜ୍ଞା।

ସୂଚନା ଥାଉକି, ପ୍ରଜ୍ଞା ଠାକୁର୍ ଦୀର୍ଘଦିନ ଧରି ଆଖି ଓ ମସ୍ତିଷ୍କ ଜନିତ ସମସ୍ୟା ପାଇଁ ଏମ୍ସରେ ଚିକିତ୍ସିତ ହେଉଛନ୍ତି। ସଂକ୍ରମଣ ପ୍ରଥମେ ତାଙ୍କ ଆଖିରେ ହୋଇଥିଲା ପରେ ଏହା ମସ୍ତିଷ୍କ ପର୍ଯ୍ୟନ୍ତ ସଂକ୍ରମିତ ହୋଇଥିଲା।

 

You might also like