ନେତାଙ୍କ ଦାଦାଗିରି: ଦୁଇ ଭଉଣୀଙ୍କୁ ବାନ୍ଧି ରାସ୍ତାରେ ଘୋଷାଡ଼ିଲେ

କୋଲକାତା:କୋଲକାତରେ ତୃଣମୂଳ କଂଗ୍ରେସ ନେତାଙ୍କ ଦାଦାଗିରି। ଦିନ ଦ୍ୱିପହରରେ ଟିଏମ୍‌ସି ନେତା ଜଣେ ମହିଳାଙ୍କୁ ତଳେ ପକାଇ ଘୋଷାଡିବା ସହିତ ମାଡ଼ ମାରିଛନ୍ତି।  ଖାଲି ମହିଳା ଜଣଙ୍କ ନୁହେଁ ତାଙ୍କ ବଡ଼ ଭଉଣୀର ମଧ୍ୟ ସମାନ ଅବସ୍ଥା କରି ମମତା ବାନାର୍ଜୀଙ୍କ ନେତା ନିଜର ଦମ ଦେଖାଇଛନ୍ତି। ସୋଶାଲ ମିଡିଆରେ ଏହାର ଭିଡିଓ ଓ ଫଟୋ ଭାଇରାଲ ହେବା ପରେ ଭାବମୂର୍ତ୍ତି ସଜାଡ଼ିବାକୁ ଯାଇ ରବିବାର ଟିଏମସି ନେତା ଅମଲ ସରକାରଙ୍କୁ ଦଳ ନିଲମ୍ୱନ କରିଛି।

ସୋଶାଲ ମିଡିଆରେ ଟିଏମସି ନେତାଙ୍କ କାରନାମାକୁ କଟୁ ଭାଷାରେ ସମାଲୋଚନା କରାଯାଇଛି। କିନ୍ତୁ ପୁଲିସ ଅମଲ କି ତାଙ୍କ ସହଯୋଗୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ନାହିଁ। ଅମଲ ସରକାର ହେଉଛନ୍ତି ଦକ୍ଷିଣ ଦିନଜପୁର ଜିଲ୍ଲା ଫତାନଗର ଗାଁର ନିର୍ବାଚିତ ପଞ୍ଚାୟତ ପ୍ରତିନିଧି।

ମହିଳାଙ୍କର ଅପରାଧ ଯେ,  ଶନିବାର ରାସ୍ତା କାମରେ ତାଙ୍କର ଜାଗା ଅଧିକ ଯାଉଥିବାରୁ ସେ  ପ୍ରତିବାଦ କରିଥିଲେ।   ବିବାଦ ବଢ଼ିବା ପରେ ଟିଏମସିର ଦିନଜପୁର ଜିଲ୍ଲା ମୁଖ୍ୟ ଅରପିତା ଘୋଷ ଅମଲ ସରକାରଙ୍କୁ ନିଲମ୍ୱନ କରିଛନ୍ତି।

ଅମଲ ଏବଂ ତାଙ୍କ ସହଯୋଗୀଙ୍କ ଦ୍ୱାରା ଆକ୍ରମଣର ଶିକାର ହୋଇଥିବା ମହିଳା ହେଉଛନ୍ତି ସ୍ମୃତି ଦାସ। ପେଶାରେ ସେ ଜଣେ ହାଇସ୍କୁଲ ଶିକ୍ଷୟିତ୍ରୀ। ତାଙ୍କ ବଡ଼ ଭଉଣୀ ସୋମା ଦାଶ ମଧ୍ୟ ଆକ୍ରମଣର ଶିକାର ହୋଇଛନ୍ତି। ସ୍ମୃତି ଦାସ ତାଙ୍କ ଭଉଣୀ ଏବଂ ମାଙ୍କ ସହ ଫତାନଗର ଗାଁରେ ରୁହନ୍ତି। ତାଙ୍କ ଘର ସାମ୍ନାରେ ୧୨ ଫୁଟ ଓସାରର ରାସ୍ତା ତିଆରି ହେବ ବୋଲି ପ୍ରଥମେ ତାଙ୍କୁ ଗ୍ରାମ ପଞ୍ଚାୟତ ତରଫରୁ କୁହାଯାଇଥିଲା। ହେଲେ ରାସ୍ତା କାମ ତିଆରି ହେବା ବେଳକୁ ଗ୍ରାମ ପଞ୍ଚାୟତ ତରଫରୁ ୨୪ ଫୁଟର ରାସ୍ତା ପାଇଁ କାମ ଆରମ୍ଭ ହୋଇଥିଲା। ଏଥିପାଇଁ ବୁଲଡୋଜର, କ୍ରେନ ଆଦି ଆସିଥିଲା। ହେଲେ ନିଜ ଜାଗା ଅଧିକ ଯାଉଥିବା ଦେଖି ସ୍ମୃତି ପ୍ରତିବାଦ କରିଥିଲେ।

ଏହାପରେ ଅମଲ ଏବଂ ତାଙ୍କର ସହଯୋଗୀ ସ୍ମୃତିଙ୍କୁ ତଳେ ଧକ୍କା ମାରି ପକାଇ ଦେଇଥିଲେ। ଏହାପରେ ତାଙ୍କ ଗୋଡ଼କୁ ଏକ ଦଉଡ଼ିରେ ଟାଣି ଟାଣି ନେଇଥିଲେ। ବଡ଼ ଭଉଣୀ ସୋମା ଦାଶ ପ୍ରତିବାଦ କରିବାରୁ ତାଙ୍କର ମଧ୍ୟ ସମାନ ଅବସ୍ଥା କରିଥିଲେ ଟିଏମସି ନେତା ଅମଲ। ଏମିତିକି ତାଙ୍କ ମା’ ଆପତ୍ତି କରିବାରୁ ତାଙ୍କୁ ମଧ୍ୟ ଧକ୍କା ଦେଇ ତଳେ ପକାଇ ଦେଇଥିଲେ ଅମୁଲଙ୍କ ସହଯୋଗୀ।

ଉଭୟ ଆହତ ହେବା ପରେ ତାଙ୍କୁ ସ୍ଥାନୀୟ ଲୋକମାନେ ହସ୍ପିଟାଲରେ ଭର୍ତ୍ତି କରିଥିଲେ। ଉଭୟ ଶନିବାର ଦିନ ହସ୍ପିଟାଲରୁ ମଧ୍ୟ ଡିସଚାର୍ଜ ହୋଇଥିଲେ। ଶନିବାର ଏ ନେଇ ସ୍ମୃତିଙ୍କ ପକ୍ଷରୁ ଥାନାରେ ଏତଲା ଦିଆଯାଇଥିଲା। ହେଲେ ଅମଲଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିବା ସୂଚନା ରହିଛି।

You might also like