ଆସନ୍ତାକାଲି ରାମ ମନ୍ଦିର ଭୂମିପୂଜନ; ହନୁମାନଗଡ଼ିରୁ ଆରମ୍ଭ ହେଲାଣି ପୂଜା

ଅଯୋଧ୍ୟା : ଅଯୋଧ୍ୟାରେ ଭଗବାନ ରାମଙ୍କ ଭବ୍ୟ ମନ୍ଦିର ନିର୍ମାଣ ପାଇଁ ଆସନ୍ତା କାଲି ହେବ ଭୂମି ପୂଜନ। ଏହି ଭୂମି ପୂଜନ  କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।  ଏଥିଲାଗି ଚଳଚଞ୍ଚଳ ସାରା ଅଯୋଧ୍ୟା।  ଆଜିଠାରୁ ଅଯୋଧ୍ୟାର ହନୁମାନଗଡ଼ି ମନ୍ଦିରରେ ପୂଜାର୍ଚ୍ଚନା ଆରମ୍ଭ ହୋଇଛି । ସକାଳରୁ ୮ଟାରୁ ରାମ ଅର୍ଚ୍ଚନା ପୂଜା କାର୍ଯ୍ୟକ୍ରମ ସହ ହନୁମାନଗଡ଼ି ମନ୍ଦିରରୁ ପୂଜା ଆରମ୍ଭ ହୋଇଯାଇଛି ।

କଡା ସୁରକ୍ଷା ବ୍ୟବସ୍ଥା ମଧ୍ୟରେ ଚାଲିଛି କାର୍ଯ୍ୟକ୍ରମ। ଏହି କାର୍ଯ୍ୟକ୍ରମରେ ଯେଉଁମାନଙ୍କୁ ଆମନ୍ତ୍ରିତ କରାଯାଇଛି କେବଳ ସେଇମାନଙ୍କୁ ହିଁ ଆସିବା ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅନୁରୋଧ କରିଛନ୍ତି।

ଆସନ୍ତାକାଲି ଭୂମି ପୂଜନ କାର୍ଯ୍ୟକ୍ରମ ସ୍ଥିର ହୋଇଛି । ପିଏମ୍ ମୋଦି ପ୍ରଭୁ ରାମଙ୍କ ଦର୍ଶନ ମଧ୍ୟ କରିବେ । ଭୂମି ପୂଜନରେ ପାରିଜାତ ବୃକ୍ଷ ରୋପଣ କରିବେ । ମଞ୍ଚରେ ପ୍ରଧାନମନ୍ତ୍ରୀ ମୋଦିଙ୍କ ସହିତ ମୋଟ ୫ ଜଣ ବସିବେ । ବାକି ୪ ଜଣ ହେଲେ ଆରଏସ୍ଏସ୍ ମୁଖ୍ୟ ମୋହନ ଭଗବତ, ଉତ୍ତର ପ୍ରଦେଶ ରାଜ୍ୟପାଳ ଆନନ୍ଦୀବେନ୍ ପଟେଲ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ମହନ୍ତ ନୃତ୍ୟ ଗୋପାଳ ଦାସ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରାୟ ୩ ଘଣ୍ଟା ଏଠାରେ ବିତାଇବେ।

ପ୍ରଧାନମନ୍ତ୍ରୀଙ୍କ ଗସ୍ତ ଅବସରରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଆଜି ରାତିରୁ ଅଯୋଧ୍ୟାର ସମସ୍ତ ସୀମା ସିଲ୍ କରାଯିବ । ଆସନ୍ତାକାଲି ରାତ୍ରି ୧୨ଟା ପର୍ଯ୍ୟନ୍ତ ଏହି କଟକଣା ରହିବ । ଭୂମି ପୂଜନ ଉତ୍ସବ ଲାଗି ୧୭୫ ଅତିଥିଙ୍କୁ ଆମନ୍ତ୍ରିତ କରାଯାଇଛି ।

୧୭୫ ଜଣଙ୍କ ମଧ୍ୟରୁ ୧୩୫ ଜଣ ସାଧୁସନ୍ଥ ରହିଛନ୍ତି । ଏହି ଅବସରରେ ନେପାଳରୁ ମଧ୍ୟ ସାଧୁସନ୍ଥକୁ ଆମନ୍ତ୍ରିତ କରାଯାଇଛି ।ଗତ ଏପ୍ରିଲ ୧୮ ପରେ ଗର୍ଭଗୃହରେ ବାସ୍ତୁପୂଜା ଏବଂ ଆହୁତି ପ୍ରଦାନ କରାଯାଉଛି । ଏହି ପୂଜାରେ କାଶୀ, ଅଯୋଧ୍ୟା, ଦିଲ୍ଲୀ, ପ୍ରୟାଗରୁ ବିଦ୍ୱାନମାନଙ୍କୁ ଡକାଯାଇଛି । ବିଭିନ୍ନ ପୁଜା ପାଇଁ ଅଲଗା ଅଲଗା ବ୍ରାହ୍ମଣ ରହିଛନ୍ତି । ୨୧ ଜଣ ବ୍ରାହ୍ମଣଙ୍କୁ ନେଇ ପୁରା ଟିମ ଗଠନ ହୋଇଛି । ନିଜେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସବୁ ପ୍ରସ୍ତୁତିର ସମୀକ୍ଷା କରିଛନ୍ତି ।

 

 

You might also like