ବନ୍ୟା ପରେ ଡରାଇଲା ଭୂକମ୍ପ

ଗୌହାଟି: ଗୋଟିଏପଟେ ଆସାମରେ ବନ୍ୟା ସ୍ଥିତି ଅସମ୍ଭାଳ ଥିବାବେଳେ ଅନ୍ୟପଟେ ଭୂକମ୍ପ ଲୋକଙ୍କୁ ଆହୁରି ଭୟଭୀତ କରାଇଛି। ଆଜି ଭୋର ସମୟରେ ଆସାମର ହୈଲାକାଣ୍ଡିରେ ଭୂକମ୍ପର ଝଟ୍‌କା ଅନୁଭୂତ ହୋଇଛି। ରିକ୍ଟର ସ୍କେଲରେ ଏହାର ତୀବ୍ରତା ୪.୦ ରେକର୍ଡ କରାଯାଇଛି।

National Center for Seismology(NCS)ର ସୂଚନା ଅନୁସାରେ, ଆଜି ଭୋର ୪ଟା ୨୫ମିନିଟ୍‌ରେ ଏହି ଭୂକମ୍ପର ଝଟ୍‌କା ଅନୁଭୂତ ହୋଇଥିଲା। ହଠାତ୍‌ ଭୂକମ୍ପ ହେବା ଯୋଗୁ ଭୟରେ ଲୋକମାନେ ଘରୁ ବାହାରକୁ ଚାଲି ଆସିଥିଲେ। ବର୍ତ୍ତମାନ ସୁଦ୍ଧା କୌଣସି କ୍ଷୟକ୍ଷତିର ସୂଚନା ମିଳିପାରି ନାହିଁ।

ଅନ୍ୟପକ୍ଷେ, ଆସାମରେ ବନ୍ୟା ଯୋଗୁ ୨୭ ଜିଲ୍ଲାର ପ୍ରାୟ ୪୦ ଲକ୍ଷ ଲୋକ ପ୍ରଭାବିତ ହୋଇଛନ୍ତି। ବନ୍ୟାରେ ୭୧ ଜଣଙ୍କ ମୃତ୍ୟୁ ହୋଇଥିବା ସରକାରୀ ଭାବେ କୁହାଯାଇଛି। Central Water Commissionଙ୍କ ରିପୋର୍ଟ ଅନୁସାରେ, ରାଜ୍ୟର ଅଧିକାଂଶ ନଦୀର ଜଳ ବିପଦ ସଙ୍କେତ ଉପରେ ପ୍ରବାହିତ ହେଉଛି। ବ୍ରହ୍ମପୁତ୍ର ନଦୀ ଉଗ୍ରରୂପ ନେଇଛି।

ବନ୍ୟା ବିପନ୍ନଙ୍କୁ ଉଦ୍ଧାର ଓ ରିଲିଫ୍ ପହଞ୍ଚାଇବା କାର୍ଯ୍ୟରେ NDRF ଟିମ୍‌ ସାମିଲ ହୋଇଛନ୍ତି। ବିପନ୍ନଙ୍କ ପାଇଁ ୩୦ ଜିଲ୍ଲାରେ ୪୮୭ ରିଲିଫ୍ କ୍ୟାମ୍ପ କରାଯାଇଛି। ୧ଲକ୍ଷ ୨୫ ହଜାର ବିପନ୍ନଙ୍କୁ ଆଶ୍ରୟସ୍ଥଳୀରେ ରଖାଯାଇଛି।

You might also like