ନୂଆଦିଲ୍ଲୀ : ଆସନ୍ତାବର୍ଷ ହେବାକୁ ଥିବା ଗୁଜୁରାଟ ବିଧାନସଭା ନିର୍ବାଚନ ଲଢ଼ିବ ଆମ୍ ଆଦମି ପାର୍ଟି । ସୋମବାର ଦିନ ଆମ୍ ଆଦମୀ ପାର୍ଟିର ସୁପ୍ରିମୋ ଅରବିନ୍ଦ କେଜ୍ରିୱାଲ ଏନେଇ ଘୋଷଣା କରିଛନ୍ତି । ସମସ୍ତ ଆସନରେ ଦଳର ପ୍ରାର୍ଥୀମାନେ ପ୍ରତିଦ୍ୱନ୍ଦ୍ୱିତା କରିବେ ବୋଲି ଅହମ୍ମଦାବାଦରେ ଏକ ସାମ୍ବାଦିକ ସମ୍ମିଳନୀରେ ଅରବିନ୍ଦ କେଜ୍ରିୱାଲ କହିଛନ୍ତି ।

ଏହାପୂର୍ବରୁ ଗୁଜୁରାଟ ଗସ୍ତ ପୂର୍ବରୁ ଅରବିନ୍ଦ କେଜ୍ରିୱାଲ ରବିବାର ଗୁଜୁରାଟୀ ଭାଷାରେ ଟ୍ୱିଟ କରିଥିଲେ । ଟ୍ୱିଟ୍ କରି ଲେଖିଥିଲେ ‘ବର୍ତ୍ତମାନ ରାଜ୍ୟରେ ପରିବର୍ତ୍ତନ ଆସିବ । ମୁଁ ଗୁଜୁରାଟ ଆସୁଛି ଏବଂ ରାଜ୍ୟବାସୀଙ୍କୁ ଭେଟିବି।

ସେହିପରି ଗୁଜୁରାଟ ନିର୍ବାଚନରେ ପଟିଦାର ସମାଜକୁ ଏକାଠି ଆଣିବାକୁ ଚେଷ୍ଟା କରୁଥିବା କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ । ରବିବାର ଦିନ କାଗୱଡ଼ର ଖୋଡାଲଧାମରେ ପଟିଦାର ସମାଜର ମୁଖ୍ୟମାନଙ୍କର ଏକ ବୈଠକ ଅନୁଷ୍ଠିତ ହୋଇଥିଲା। ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ ପଟିଦାର ସମାଜର ଉଚିତ୍ ବୋଲି ବୈଠକରେ ନିଷ୍ପତ୍ତି ହୋଇଥିଲା ।

ଆମ୍ ଆଦମି ପାର୍ଟିକୁ ନେଇ ଏବେ ଗୁଜୁରାଟ ରାଜନୀତି ସରଗରମ ରହିଛି । ରାଜ୍ୟରେ ଆପ୍ ସକ୍ରିୟ ଭୂମିକା ଗ୍ରହଣ କରୁଥିବା ଶୁଣିବାକୁ ମିଳୁଛି । ଏଥିପାଇଁ ହାର୍ଦ୍ଦିକ ପଟେଲକୁ ନିଜର ନିର୍ବାଚନୀ ଚେହେରା ରୂପେ ସାମ୍ନାକୁ ଆଣିବାକୁ ପ୍ରସ୍ତୁତି ଆରମ୍ଭ ହୋଇଯାଇଛି । ଏଭଳି ପରିସ୍ଥିତିରେ ହାର୍ଦ୍ଦିକ ପଟେଲ ମଧ୍ୟ ଭବିଷ୍ୟତରେ ଆପରେ ଯୋଗଦେବାର ଅନେକ ସମ୍ଭାବନା ରହିଛି ।

Other Stories