ସଂକ୍ରମଣକୁ ରୋକିବା ପାଇଁ କରୋନା ଆକ୍ରାନ୍ତ ନର୍ସ କଲେ ଆତ୍ମହତ୍ୟା

ରୋମ୍‌: ମହାମାରୀ ରୂପ ନେଇଥିବା କରୋନା ଇଟାଲିରେ ତାଣ୍ଡବ ରଚୁଛି। ଏହି ମହାମାରୀ ଇଟାଲିରେ ବୁଧବାର ସୁଦ୍ଧା ୭ ହଜାର ଲୋକଙ୍କର ଜୀବନ ନେଲାଣି। ଏଠାରେ ସରକାର, ଡାକ୍ତର ଅସହାୟ ହୋଇପଡ଼ିଲେଣି। ଇତି ମଧ୍ୟରେ କରୋନା ରୋଗୀଙ୍କୁ ଚିକିତ୍ସା କରୁଥିବା ଜଣେ ନର୍ସଙ୍କ ରିପୋର୍ଟ ପଜେଟିଭ ଆସିବା ପରେ ସେ ଆତ୍ମହତ୍ୟା କରିଛନ୍ତି।

ସ୍ଥାନୀୟ ଗଣମାଧ୍ୟମରେ ପ୍ରକାଶିତ ଏକ ଖବର ଅନୁଯାୟୀ, ୩୪ ବର୍ଷିୟ ଏହି ନର୍ସ ଜଣକ ଯେତେବେଳେ ଜାଣିଲେ ଯେ ସେ କରୋନା ଆକ୍ରାନ୍ତ ହୋଇଛନ୍ତି ସେ ଚିନ୍ତିତ ହୋଇପଡ଼ିଲେ। ତାଙ୍କର ଭୟଥିଲା ତାଙ୍କଠାରୁ ଆଉ କାହାକୁ ଏହା କାଳେ ସଂକ୍ରମିତ ହୋଇଯିବ । ତେଣୁ ସେ ଏପରି ଚରମ ନିଷ୍ପତ୍ତି ନେଇଥିଲେ।

ଡାନିଏଲ ଟ୍ରେଜି ନାମ୍ନୀ ଏହି ନର୍ସ ଇଟାଲିର ସର୍ବାଧିକ କରୋନା କ୍ଷତିଗ୍ରସ୍ତ ଲୋମ୍ବାର୍ଡିର ଏକ ଡାକ୍ତରଖାନାରେ କାମ କରନ୍ତି। ଇଟାଲିର ନର୍ସିଂ ମହାସଂଘର କହିବା ଅନୁଯାୟୀ ରିପୋର୍ଟ ଦେଖିବା ପରେ ଟ୍ରେଜି ବହୁତ ଚିନ୍ତିତ ଥିଲେ। ତାଙ୍କର ଚିନ୍ତା ଥିଲା, କରୋନା ସଂକ୍ରମଣକୁ ନିୟନ୍ତ୍ରଣ କରିବାକୁ ସେ ଚେଷ୍ଟା କରୁଥିଲେ, ଏବେ ତାଙ୍କ ଦ୍ୱାରା ଏହା ବ୍ୟାପିବ। ତେଣୁ ସେ ଆତ୍ମହତ୍ୟା କରିଥିଲେ।
ସୂଚନାଥାଉ କି, ଇଟାଲିରେ ବୁଧବାର ସୁଦ୍ଧା କରୋନା ସଂକ୍ରମଣରେ ୬,୮୨୦ ଲୋକଙ୍କର ଜୀବନ ଗଲାଣି।

ଆହୁରି ପଢ଼ନ୍ତୁ

You might also like