ଆଜିଠୁ ସଂସଦର ମୌସୁମୀ ଅଧିବେଶନ

ନୂଆଦିଲ୍ଲୀ: ଆଜିଠୁ ଆରମ୍ଭ ହେଉଛି ସଂସଦର ମୌସୁମୀ ଅଧିବେଶନ। କୋଭିଡ୍ ପାଇଁ ସଂସଦର ଉଭୟ ଗୃହରେ ଯଥେଷ୍ଟ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି। ସାମାଜିକ ଦୂରତା ସହ ସଦସ୍ୟଙ୍କ ବସିବା ଲାଗି ସ୍ୱତନ୍ତ୍ର ବ୍ୟବସ୍ଥା ହୋଇଛି। ପେପର୍ ବଦଳରେ ଗୃହ କାର୍ଯ୍ୟକୁ ଡିଜିଟାଲ୍ କରିବା ଉପରେ ଗୁରୁତ୍ୱ ଦିଆଯାଇଛି।

ଚଳିତ ଅଧିବେଶନରେ ଭାରତ-ଚୀନ୍ ସୀମା ବିବାଦ ଓ ଅର୍ଥନୀତି ଦୂରାବସ୍ଥା ମୁଖ୍ୟ ପ୍ରସଙ୍ଗ ହୋଇପାରେ। ଏହାକୁ ନେଇ ସରକାରଙ୍କୁ ଘେରିବାକୁ ଯୋଜନା କରିଛନ୍ତି ବିରୋଧୀ। ଏହାସହ ନୂଆ ଶିକ୍ଷା ନୀତି, କରୋନା ପରିଚାଳନା ପ୍ରସଙ୍ଗ ବି ଉଠିପାରେ। ତେବେ ଗଲ୍‌ଓ୍ୱାନ୍‌ ଘାଟିରେ ହୋଇଥିବା ସଂଘର୍ଷ ଘଟଣାରେ ସରକାର ବିବୃତି ଜାରି କରିପାରନ୍ତି।

୧୮ ଦିନିଆ କାର୍ଯ୍ୟଦିବସ ବିଶିଷ୍ଟ ମୌସୁମୀ ଅଧିବେଶନ ଅକ୍ଟୋବର ୧ ତାରିଖରେ ଶେଷ ହେବ। କରୋନା ପାଇଁ ଏଥର ରାଜ୍ୟସଭା ଓ ଲୋକସଭା ସିଫ୍ଟ ଅନୁସାରେ ବସିବ।

ଆଜି ସକାଳ ୯ଟାରୁ ଅପରାହ୍ଣ ୧ଟା ଯାଏ ଲୋକସଭା ଅଧିବେଶନ ହେବାକୁ ଥିବାବେଳେ ଅପରାହ୍ନ ୩ଟାରୁ ସଂଧ୍ୟା ୭ଯାଏ ରାଜ୍ୟସଭା ଅଧିବେଶନ୍ ବସିବ। ଅଧିବେଶନ ପୂର୍ବରୁ ହେଉଥିବା ସର୍ବଦଳୀୟ ବୈଠକକୁ ଏଥର ବାତିଲ କରାଯାଇଛି। ୨୦ ବର୍ଷ ପରେ ଚଳିତ ବର୍ଷ କରୋନା ପାଇଁ ଅଧିବେଶନ ପୂର୍ବରୁ ସର୍ବଦଳୀୟ ବୈଠକ ବସିନାହିଁ।

ଗତକାଲି ବାଚସ୍ପତି ଓମ୍ ବିର୍ଲାଙ୍କ ଅଧ୍ୟକ୍ଷତାରେ ଲୋକସଭା କାର୍ଯ୍ୟ ପରାମର୍ଶଦାତା ସମିତି ବୈଠକ ଅନୁଷ୍ଠିତ ହୋଇଥିଲା। ଏଥିରେ ପ୍ରଶ୍ନକାଳ ଉଚ୍ଛେଦ, ଶୂନ୍ୟକାଳ କାଣ୍ଟଛାଣ୍ଟ ଉପରେ ଆଲୋଚନା ହୋଇଥିଲା। ଏପଟେ ଅଧିବେଶନ ପୂର୍ବରୁ ସମସ୍ତ ସାଂସଦଙ୍କ କୋଭିଡ୍ ଟେଷ୍ଟ ପାଇଁ ନିର୍ଦ୍ଦେଶ ଦିଆଯାଇଥିବାରୁ ଟେଷ୍ଟ୍‌ରେ ୫ ସାଂସଦଙ୍କ କରୋନା ରିପୋର୍ଟ ପଜିଟିଭ ଆସିଛି।

You might also like