ବ୍ରେନ୍‌ ଷ୍ଟ୍ରୋକ୍‌ ପୂର୍ବରୁ ଦେଖାଦେଇଥାଏ ଏପରି ଲକ୍ଷଣ…

ମୁଣ୍ଡ ବୁଲାଇବା, ନିଜ ଉପରେ ନିୟନ୍ତ୍ରଣ ନ ରହିବା

ମସ୍ତିଷ୍କରେ ଠିକ୍‌ ଭାବେ ଅକ୍ସିଜେନ ପହଞ୍ଚି ନ ପାରିବାରୁ ଷ୍ଟ୍ରୋକର କିଛି ଦିନ ପୂର୍ବରୁ ଛୋଟ ଛୋଟ ଷ୍ଟ୍ରୋକ ହୋଇଥାଏ। ଯାଉଥିବା ବେଳେ ହଠାତ୍‌ ପଡ଼ିଯିବା, ଠିକ୍‌ ଭାବେ ପାଦ ନ ପଡ଼ିବା, ମୁଣ୍ଡ ବୁଲାଇ ପଡ଼ିଯିବା, ଶରୀରର ବାଲାନ୍ସ ବିଗିଡ଼ିଯିବା ଆଦି।

ଶରୀରର ଗୋଟିଏ ପାର୍ଶ୍ୱରେ ଦୁର୍ବଳ ଅନୁଭବ ହେବା

ଷ୍ଟ୍ରୋକ୍‌ ଶରୀରର ଏକ ଅଂଶକୁ ପ୍ରଭାବିତ କରିଥାଏ।  ତେଣୁ ଏହାର ପ୍ରଭାବ ଡାହାଣ କିମ୍ୱା ବାମ ପାର୍ଶ୍ୱରେ ଅନୁଭୂତ ହୋଇଥାଏ। ହାତ, ଗୋଡ଼ କିମ୍ବା ମୁହଁର ଗୋଟିଏ ପାର୍ଶ୍ୱ ଅକାମୀ ହେବା ପରି ଲାଗିବା,  ଅଧିକ ହାଲିଆ ଅନୁଭବ ହେବା ଆଦି ମିନି ଷ୍ଟ୍ରୋକର ଲକ୍ଷଣ।

ହଠାତ୍‌ ଜୋରରେ ମୁଣ୍ଡ ବିନ୍ଧା ହେବା

ଷ୍ଟ୍ରୋକ୍‌ ପୂର୍ବରୁ ବେଳେବେଳେ ଖୁବ୍‌ ଜୋରରେ ମୁଣ୍ଡ ବିନ୍ଧିଥାଏ ଓ ତାହା ଖୁବ୍‌ ଶୀଘ୍ର ଭଲ ବି ହୋଇଯାଇଥାଏ। ଏହା ସହ ମୁଣ୍ଡ ବୁଲାଇବା, ବାନ୍ତି ଲାଗିବା, ଚେତାଶୂନ୍ୟ ହୋଇପଡିବା ଆଦି ସମସ୍ୟା ବି ଦେଖାଦେଇଥାଏ। ଏପରି ସମସ୍ୟା ଦେଖାଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ।

ଭାବିବା ଶକ୍ତି ହରାଇ ବସିବା

ବେଳେବେଳେ ଏପରି ଅନୁଭବ କରିବେ ଯେପରି ଆପଣଙ୍କର ଭାବିବା, ଚିନ୍ତା କରିବା ଶକ୍ତି ଲୋପ ପାଇବାକୁ ବସୁଛି। ଆପଣ ସବୁ ଜାଣି ମଧ୍ୟ କିଛି ବୁଝି ପାରୁନାହାନ୍ତି। ଏହା ଷ୍ଟ୍ରୋକ୍‌ର ପ୍ରାଥମିକ ଲକ୍ଷଣ ହୋଇପାରେ।

 କିପରି ଜାଣିବେ ଏହା ଷ୍ଟ୍ରୋକ ନା ନାହିଁ

ଯେଉଁ ବ୍ୟକ୍ତିଙ୍କ ନିକଟରେ ଏସବୁ ଲକ୍ଷଣ ଦେଖାଦିଏ, ତାଙ୍କୁ ହସିବାକୁ ଚେଷ୍ଟା କରିବା ଆବଶ୍ୟକ। ଯଦି ହସିବା ସମୟରେ ଗୋଟିଏ ପାର୍ଶ୍ୱକୁ ମୁହଁ ଓହଳି ପଡ଼ିବା ପରି ଲାଗିବ, ତେବେ ଆପଣ ଜାଣିବେ ଯେ ଉକ୍ତ ବ୍ୟକ୍ତିଙ୍କୁ ଷ୍ଟ୍ରୋକ ହୋଇଛି। ଏହାବ୍ୟତୀତ ସନ୍ଦେହ ହେଲେ ଆପଣ ଉକ୍ତ ବ୍ୟକ୍ତିଙ୍କୁ ୨ ହାତ କିମ୍ୱା ଗୋଟିଏ ହାତ ଉଠାଇବାକୁ କୁହନ୍ତୁ। ଯଦି ସେ ତାହା କରିବାକୁ ସକ୍ଷମ ହେଉ ନାହାନ୍ତି, ତେବ ଏହା ଷ୍ଟ୍ରୋକ୍‌ର ଲକ୍ଷଣ। ଏପରି ସ୍ଥିତିରେ ବିଳମ୍ୱ ନ କରି ସଙ୍ଗେ ସଙ୍ଗେ ଉକ୍ତ ବ୍ୟକ୍ତିଙ୍କୁ ନିକଟସ୍ଥ ଡାକ୍ତରଖାନାକୁ ନେଇଯାଇ ଚିକିତ୍ସା ଆରମ୍ଭ କରି ଦିଅନ୍ତୁ।