ବିଗ୍‌ ବିଙ୍କୁ ଦାଦା ସାହେବ୍‌ ଫାଲ୍‌କେ

ମୁମ୍ବାଇ: ହିନ୍ଦୀ ସିନେମା ଜଗତର ବିଗ୍‌ ବି ସୁପରଷ୍ଟାର ଅମିତାଭ ବଚ୍ଚନଙ୍କୁ ମିଳିବ ଭାରତର ସର୍ବୋଚ୍ଚ ଚଳଚ୍ଚିତ୍ର ସମ୍ମାନ ଦାଦା ସାହେବ୍‌ ଫାଲ୍‌କେ। ଜୀବନ ବ୍ୟାପୀ ସାଧନା ପାଇଁ ତାଙ୍କୁ ଏହି ସମ୍ମାନ ପ୍ରଦାନ କରାଯିବ। ଏନେଇ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ଟ୍ୱିଟ୍‌ କରି ଘୋଷଣା କରିଛନ୍ତି।

କେନ୍ଦ୍ରମନ୍ତ୍ରୀ ଏହି ଟ୍ୱିଟ୍‌ରେ ଲେଖିଛନ୍ତି, ଗତ ୨ ପିଢ଼ି ଧରି ଆମକୁ ମନୋରଞ୍ଜନ ଯୋଗାଇଆସିଥିବା ଏବଂ ଆମକୁ ପ୍ରେରଣା ଯୋଗାଇ ଆସିଥିବା କିମ୍ବଦନ୍ତୀ ଅମିତାଭ ବଚ୍ଚନଙ୍କୁ ଦାଦା ସାହେବ୍‌ ଫାଲ୍‌କେ ପାଇଁ ମନୋନୀତ କରଯାଇଛି। ପୂରା ଦେଶ ଏବଂ ଅନ୍ତର୍ଜାତୀୟ ସ୍ତରରେ ଭାରତୀୟ ମାନେ ଏଥିରେ ଖୁସି ପ୍ରକାଶ କରିଛନ୍ତି। ମୁଁ ଅମିତାଭଙ୍କୁ ଅଭିନନ୍ଦନ ଜଣାଉଛି।

ସୂଚନାଯୋଗ୍ୟ ଯେ, ଦାଦା ସାହେବ ଫାଲ୍‌କେ ପୁରସ୍କାର ପ୍ରସିଦ୍ଧ ସିନେ ନିର୍ଦ୍ଦେଶକ, ପ୍ରଯୋଜକ ଏବଂ ସଂଳାପ ଲେଖକ ଧୁନ୍ଦିରାଜ ଗୋବିନ୍ଦ ଫାଲ୍‌କେ ବା ଦାଦା ସାହେବ୍‌ ଫାଲ୍‌କେଙ୍କ ନାମରେ ଦିଆଯାଇଥାଏ। ବିଗ୍‌ ବି ଅମିତାଭ ବିଭିନ୍ନ ଫିଲ୍ମ ସହ କ୍ୱିଜ୍‌ ଶୋ ‘କୌନ୍‌ ବନେଗା କରୋଡ଼ପତି’ରେ ସକ୍ରିୟ ଅଛନ୍ତି। ଶେହେନ୍‌ଶାହ ଭାବେ ମଧ୍ୟ ଘରେ ଘରେ ପରିଚିତ।

୧୯୬୯ ମସିହାରେ ‘ସାତ ହିନ୍ଦୁସ୍ତାନୀ’ରୁ ହିନ୍ଦୀ ଫିଲ୍ମରେ ପାଦ ରଖିଥିଲେ ବଚ୍ଚନ। ଏହାପରେ ଦିବାର, ସୋଲେ, କାଳିଆ, ଶକ୍ତି ଭଳି ଫିଲ୍ମରେ ତାଙ୍କ ଦମଦାର ଅଭିନୟର ଝଳକ ଦର୍ଶକ ଦେଖିଛନ୍ତି।

ଆଜି ବି ୟଙ୍ଗ ହିରୋଙ୍କ ଭିଡ଼ରେ ଅମିତାଭଙ୍କ କ୍ରେଜ୍‌ ରହିଛି । ନିକଟରେ ପିଙ୍କ, ଠଗ୍ସ ଅଫ୍ ହିନ୍ଦୁସ୍ଥାନରେ ତାଙ୍କର ସେହି ପୁରୁଣା ଅନ୍ଦାଜକୁ ଦେଖିଛନ୍ତି ଦର୍ଶକ।

ସେପଟେ ଅମିତାଭଙ୍କୁ ଦାଦା ସାହେବ ମିଳିବା ନେଇ ଘୋଷଣା ହେବା ପରେ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି।

ଆହୁରି ପଢ଼ନ୍ତୁ

You might also like