ଭେଣ୍ଟିଲେଟର ମିଳିଲାନି, ଛଟପଟ ହୋଇ ଆଖି ବୁଜିଲେ କରୋନା ଆକ୍ରାନ୍ତ ଏନଏସଜି କମାଣ୍ଡୋ

ନୂଆଦିଲ୍ଲୀ: ମହାମାରୀ ତା’ର କାୟା ବିସ୍ତାର କରି ଚାଲିଛି । ମହାମାରୀ ଯେତେ ବଢୁଛି, ଆମର ସ୍ୱାସ୍ଥ୍ୟାବସ୍ଥା ବ୍ୟବସ୍ଥା କେତେ ବିପର୍ଯ୍ୟସ୍ତ ତାହା ଆମ ଆଖିରେ ସ୍ପଷ୍ଟ ହୋଇଯାଉଛି । ପ୍ରଭାବଶାଳୀ ବ୍ୟକ୍ତି, ରାଜନେତାମାନେ ଡାକ୍ତରଖାନାରେ ବେଡଟିଏ ପାଇବା ପାଇଁ ଯେମିତି ହଟହଟା ହେଉଛନ୍ତି ସେଠି ସାଧାରଣ ଲୋକଙ୍କୁ କିଏ ବା ପଚାରେ ? ରୋଗୀଙ୍କ ସଂଖ୍ୟା ଦିନକୁ ଦିନ ଏତେ ବଢୁଛି ଯେ ଡାକ୍ତରଖାନାରେ ବେଡଟିଏ ମିଳିବା କଷ୍ଟକର ହୋଇପଡ଼ୁଛି । ଉପଯୁ୍‌କ୍ତ ଚିକିତ୍ସା ଅଭାବରୁ ଅନେକ ଲୋକ ଛଟପଟ ହୋଇ ମରୁଥିବା ନଜରକୁ ଆସିଛି ।

ଦେଶରେ ଆତଙ୍କାବଦୀ ବିରୋଧରେ ଲଢୁଥିବା ଏନଏସ୍‌ଜିର ଜଣେ ବରିଷ୍ଠ କମାଣ୍ଡୋଙ୍କ କରୋନାରେ ମୃତ୍ୟୁ ଘଟିଛି । ସବୁଠାରୁ ଦୁଃଖର କଥା, କରୋନା ଆକ୍ରାନ୍ତ କମାଣ୍ଡୋଙ୍କୁ କେଉଁଠି ବେଡଟିଏ ମିଳି ନ ଥିଲା । ବେଡ ପାଇଁ ୫ ଘଣ୍ଟା ବୁଲିବା ପରେ ଶେଷରେ ସେ ଆଖି ବୁଜିଦେଲେ ।

କରୋନାରେ ଏନଏସଜି କମାଣ୍ଡୋଙ୍କର ମୃତ୍ୟୁ ଘଟିବା ଦେଶରେ ପ୍ରଥମ । ତେବେ ଜଣେ ବରିଷ୍ଠ କମାଣ୍ଡୋଙ୍କୁ ସ୍ଵତନ୍ତ୍ର ଚିକିତ୍ସା ମିଳିବାରେ ବିଳମ୍ବ ହେବା କାରଣରୁ ତାଙ୍କର ମୃତ୍ୟୁ ଘଟିଥିବା ଅଧିକାରୀମାନେ ଅଭିଯୋଗ ଆଣିଛନ୍ତି ।
ଅଧିକାରୀଙ୍କ କହିବା ଅନୁଯାୟୀ, ଗ୍ରୁପ୍‌ କମାଣ୍ଡର ବୀରେନ୍ଦ୍ର କୁମାର ଝା କୋଭିଡ ୧୯ରେ ସଂକ୍ରମିତ ହୋଇଥିଲେ । ତାଙ୍କୁ ଗ୍ରେଟର ନଏଡାର ସେଣ୍ଟ୍ରାଲ ଆର୍ମଡ ପୋଲିସ ଫୋର୍ସ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ୫ ତାରିଖ ସକାଳେ ସେ ଶେଷ ନିଃଶ୍ଵାସ ତ୍ୟାଗ କରିଥିଲେ । ମୃତ୍ୟୁ ବେଳକୁ ତାଙ୍କୁ ୫୩ ବର୍ଷ ହୋଇଥିଲା ।
ଅଧିକାରୀଙ୍କ କହିବା ଅନୁଯାୟୀ,ପୂର୍ବଦିନ ରାତିରେ ତାଙ୍କର ସ୍ୱାସ୍ଥ୍ୟାବସ୍ଥା ବିଗିଡିବାରେ ଲାଗିଲା । ଠିକ ସେତିକିବେଳେ ସିଆରପିଏଫ ଡାକ୍ତରଖାନାରେ ଭେଣ୍ଟିଲେଟର ଆଇସିୟୁ କାମ କରୁନ ଥିଲା । ତାଙ୍କୁ ବାଇପେପ୍‌ ପ୍ରଣାଳୀରେ ରଖାଯାଇଥିଲା । ସିଆରପିଏଫ ଅଧିକାରୀ କହିଛନ୍ତି, କମାଣ୍ଡୋଙ୍କୁ ଆଇସିୟୁକୁ ସ୍ଥାନାନ୍ତର କରିବା ପାଇଁ ଡାକ୍ତର ପରାମର୍ଶ ଦେବା ପରେ ଆଇସିୟୁ ବେଡ ଖୋଜା ପଡ଼ିଲା ।

ଜଣେ ଅଧିକାରୀଙ୍କ କହିବା ଅନୁଯାୟୀ, ଦୀର୍ଘ ସମୟ ଧରି ଆଇସିୟୁ ବେଡ ଖୋଜିବା ପରେ ନଏଡାର ଏକ ଘରୋଇ ଡାକ୍ତରଖାନାରେ ଭେଣ୍ଟିଲେଟର ମିଳିଥିଲା । ହେଲେ ତାଙ୍କୁ ନେବାପାଇଁ କାର୍ଡିଆକ ଆମ୍ବୁଲାନ୍ସ ଯୋଗାଡ କରିବାରେ ପୁଣି ବିଳମ୍ବ ହୋଇଗଲା । ଏନଏସଜିରୁ କାର୍ଡିଆକ ଆମ୍ବୁଲାନ୍ସ ଆସିଲା । କିନ୍ତୁ ଇତି ମଧ୍ୟରେ ତାଙ୍କ ହୃଦଘାତ ହୋଇଥିଲା ଏବଂ ତାଙ୍କର ମୃତ୍ୟୁ ଘଟିଥିଲା ।

ମିଡିଆ ରିପୋର୍ଟ ଅନୁସାରେ, ବୀରେନ୍ଦ୍ର କୁମାରଙ୍କୁ ନଏଡାର ରେଫରାଲ ହସ୍ପିଟାଲରରେ ଆଇସିୟୁ ବେଡ ଖାଲି ନ ଥିବାରୁ ଅନ୍ୟ ହସ୍ପିଟାଲକୁ ଯିବା ପାଇଁ ପରାମର୍ଶ ଦିଆଯାଇଥିଲା । ଏହା ପରେ ଦିଲ୍ଲୀରେ ଡାକ୍ତରଖାନାରେ କେଉଁଠି ଭେଣ୍ଟିଲେଟର ଅଛି ଖୋଜା ଯାଇଥିଲା । ଭେଣ୍ଟିଲେଟର ଖୋଜିବାରେ ୫ ଘଣ୍ଟା ବିଳମ୍ବ ହୋଇଯାଇଥିଲା । ଏହି ସମୟ ମଧ୍ୟରେ ବୀରେନ୍ଦ୍ରଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡିଥିଲା ।

You might also like