ହୋଟେଲ୍‌ର ଦାମ୍‌ ଶୁଣିଲେ ଉଡ଼ିଯିବ ହୋସ୍

ଭୁବନେଶ୍ୱର (ସଂଗ୍ରାମ କେଶରୀ ଦାସ ମହାପାତ୍ର): ଆପଣ ମହାକାଶ ଯାତ୍ରାର ସ୍ୱପ୍ନ ଦେଖୁଛନ୍ତି କି? ଜିରୋ ଗ୍ରାଭିଟିରେ ମହାକାଶଚାରୀଙ୍କ ପରି ଭାସି ବୁଲିବାକୁ ଚାହୁଁଛନ୍ତି କି? ଗୋଟିଏ ଦିନରେ ୧୬ଥର ସୂର୍ଯ୍ୟୋଦୟ ଓ ସୂର୍ଯ୍ୟାସ୍ତ ଦେଖିବାକୁ ଚାହୁଁଛନ୍ତି କି? କିଛି ନହେଲେ ବି, ଆପଣ ପୃଥିବୀ ବାହାରେ ଛୁଟି କଟାଇବାକୁ ଚାହୁଁଛନ୍ତି କି? ଆଉ ୪ ବର୍ଷ ଅପେକ୍ଷା କରନ୍ତୁ । ଆପଣଙ୍କ ଇଚ୍ଛା ୨୦୨୨ ମସିହା ସୁଦ୍ଧା ପୂରଣ ହୋଇପାରେ । କାରଣ ମହାକାଶରେ ପ୍ରଥମ ବିଳାସପୂର୍ଣ୍ଣ ହୋଟେଲ ଖୋଲିବାକୁ ‘ଅରିଅନ୍ ସ୍ପାନ୍’ ନାମକ ଏକ କମ୍ପାନୀ କାଲିଫର୍ଣ୍ଣିଆରେ ଅନୁଷ୍ଠିତ ସ୍ପେସ୍‌ ୨.୦ ସମ୍ମିଳନୀରେ ଘୋଷଣା କରିଛି । ମହାକାଶରେ ସ୍ଥାପିତ ହେବାକୁ ଥିବା ଏହି ହୋଟେଲର ନାଁ ରହିବ ‘ଅରୋରା ଷ୍ଟେସନ୍’ ।

ଅରୋରା ଷ୍ଟେସନ୍ ୨୦୨୧ ମସିହାରେ ପୃଥିବୀ ପୃଷ୍ଠରୁ ୩୨୨ କିଲୋମିଟର ଦୂରରେ ଅବସ୍ଥାପିତ ହେବ । ଏହା ଅନ୍ତର୍ଜାତୀୟ ମହାକାଶ କେନ୍ଦ୍ର ଆଇଏସ୍ଏସ୍ ଠାରୁ ମାତ୍ର ୮୦ କିଲୋମିଟର ତଳେ ପୃଥିବୀକୁ ଦିନକୁ ୧୬ଥର ପରିକ୍ରମା କରିବ । ପ୍ରତି ୯୦ ମିନିଟରେ ସୂର୍ଯ୍ୟୋଦୟ ଓ ସୂର୍ଯ୍ୟାସ୍ତ ଦେଖିହେବ । ସେଠାରେ ଆପଣ ମାଇକ୍ରୋ ଗ୍ରାଭିଟି ବା କ୍ଷୀଣ ମାଧ୍ୟାକର୍ଷଣରେ ଭାସିବୁଲିବେ । ମହାକାଶଚାରୀଙ୍କ ଭଳି ସମସ୍ତ ଅନୁଭୂତି ପାଇବେ । ମହାକାଶରେ ରହି ହାଇସ୍ପିଡ୍ ଇଣ୍ଟରନେଟ୍ ସାହାଯ୍ୟରେ ପୃଥିବୀରେ ଥିବା ପରିବାରଲୋକ କିମ୍ବା ବନ୍ଧୁ ଓ ପ୍ରିୟଜନଙ୍କୁ ସହ ଭିଡିଓ କଲ୍ କରିପାରିବେ । ମହାକାଶରୁ ପୃଥିବୀକୁ ଦେଖିବାର ସୁଯୋଗ ପାଇବେ ।

୨୦୨୨ ମସିହା ସୁଦ୍ଧା ସେହି ହୋଟେଲରେ ରହିବା ପାଇଁ ଲୋକ ପଠାଇବା ଆରମ୍ଭ କରିବ ‘ଅରିଅନ୍ ସ୍ପାନ୍’ କମ୍ପାନୀ । ତେବେ ଏଥିପାଇଁ କମ୍ପାନୀ ୱେବସାଇଟରେ ବୁକିଂ ଆରମ୍ଭ ହୋଇସାରିଛି । ହୋଟେଲରେ ଥରକେ ୬ଜଣ ଲୋକ (୨ଜଣ ସହାୟକଙ୍କ ସମେତ) ୧୨ ଦିନ ପାଇଁ ରହିପାରିବେ । ତେବେ ଏଥିପାଇଁ ଯାତ୍ରା ପୂର୍ବରୁ ଆପଣଙ୍କୁ ୩ମାସ ପ୍ରଶିକ୍ଷଣ ନେବାକୁ ପଡ଼ିବ ।

ଏବେ ଆସିବା ଖର୍ଚ୍ଚ ପ୍ରସଙ୍ଗକୁ । ମହାକାଶରେ ସ୍ଥାପିତ ହେବାକୁ ପ୍ରଥମ ବିଳାସପୂର୍ଣ୍ଣ ହୋଟେଲ୍ ‘ଅରୋରା ଷ୍ଟେସନ୍’ରେ ଗୋଟିଏ ଯାତ୍ରା ଅର୍ଥାତ୍ ୧୨ ଦିନ ପାଇଁ ଜଣଙ୍କୁ ୯.୫ ମିଲିୟନ୍ ଆମେରିକୀୟ ଡଲାର୍ ଅର୍ଥାତ୍ ପ୍ରାୟ ୬୨ କୋଟି ଟଙ୍କା ଦେବାକୁ ପଡ଼ିବ । ତେବେ ଏଥିପାଇଁ ଆପଣଙ୍କୁ ଏବେଠୁ ହୋଟେଲ୍ ବୁକ୍ କରିବାକୁ ଫେରସ୍ତ ଯୋଗ୍ୟ ୮୦ ହଜାର ଡଲାର୍ ଅର୍ଥାତ୍ ପ୍ରାୟ ୫୨ଲକ୍ଷ ଟଙ୍କା ଅଗ୍ରୀମ ଦେବାକୁ ପଡ଼ିବ ।

Comments
Loading...