ବିଏସ୍‌ଏଫ୍‌ର କ୍ଷମତା ବୃଦ୍ଧି ! ସୀମା ଠାରୁ ୫୦ କିମି ଦୂରତା ମଧ୍ୟରେ ସନ୍ଧିଗ୍ଧକୁ ଗିରଫ କରିବାର ଅଧିକାର ମିଳିଲା

ନୂଆଦିଲ୍ଲୀ : ଆତଙ୍କବାଦୀଙ୍କୁ ଖୋଜି ଖୋଜି ଧରିବେ ଯବାନ । ତ୍ରାହି ପାଇବେ ନାହିଁ ଆତଙ୍କୀ । ବୁଧବାର ଦିନ ସୀମା ସୁରକ୍ଷା ବଳ (ବିଏସ୍ଏଫ୍) ସମ୍ପର୍କରେ କେନ୍ଦ୍ର ଗୃହ ମନ୍ତ୍ରଣାଳୟ ଏକ ବଡ଼ ନିଷ୍ପତ୍ତି ନେଇଛି । ବିଏସଏଫର ଅଧିକାରକୁ ବଢ଼ାଇ‍ବା ସହ ତାଙ୍କୁ ଗିରଫ, ତଦନ୍ତ, ସର୍ଚ୍ଚ ଅପରେସନ୍ ଓ ଜବତ୍ କ୍ଷମତା ପ୍ରଦାନ କରାଯାଇଛି । ଭାରତ-ପାକିସ୍ଥାନ ଏବଂ ଭାରତ-ବାଂଲାଦେଶ ମଧ୍ୟରେ ଅନ୍ତର୍ଜାତୀୟ ସୀମାର ୫୦ କିଲୋମିଟର ମଧ୍ୟରେ ବିଏସଏଫକୁ ଏହି ଅଧିକାର ଦିଆଯାଇଛି । ସରଳ ଶବ୍ଦରେ କହିବାକୁ ଗଲେ ବର୍ତ୍ତମାନ ମାଜିଷ୍ଟ୍ରେଟଙ୍କ ଆଦେଶ ଏବଂ ୱାରେଣ୍ଟ ବିନା ମଧ୍ୟ ସନ୍ଧିଗ୍ଧଙ୍କୁ ଗିରଫ କରିପାରିବେ ବିଏସ୍‌ଏଫ୍ ଯବାନ୍ ।

ତେବେ ଗୃହ ମନ୍ତ୍ରଣାଳୟର ନୂତନ ଆଦେଶ ରାଜନୈତିକ ବିବାଦ ସୃଷ୍ଟି କରିବ ବୋଲି ଆଶଙ୍କା କରାଯାଉଛି । ବର୍ତ୍ତମାନ ପର୍ଯ୍ୟନ୍ତ ପଞ୍ଜାବ, ପଶ୍ଚିମବଙ୍ଗ ଏବଂ ଆସାମରେ ୧୫ କିଲୋମିଟର ମଧ୍ୟରେ ଗିରଫ ତଥା ତଦନ୍ତ କରିବାର ଅଧିକାର ଥିଲା, ଯାହା ବର୍ତ୍ତମାନ ୫୦ କିଲୋମିଟରକୁ ବୃଦ୍ଧି କରାଯାଇଛି ।

ଅନ୍ୟପଟେ ଗୁଜୁରାଟରେ ବିଏସ୍ଏଫର ଅଧିକାରକୁ ହ୍ରାସ କରାଯାଇଛି । ପୂର୍ବରୁ ୮୦ କିଲୋମିଟର ଥିବାବେଳେ ବର୍ତ୍ତମାନ ୫୦ କିଲୋମିଟରକୁ କମେଇ ଦିଆଯାଇଛି । ସେହିପରି ରାଜସ୍ଥାନରେ ଏହି ସୀମା ପୂର୍ବ ପରି ୫୦ କିଲୋମିଟରରେ ରଖାଯାଇଛି । ମେଘାଳୟ, ନାଗାଲାଣ୍ଡ, ମିଜୋରାମ, ତ୍ରିପୁରା ଏବଂ ମଣିପୁରର ପାଞ୍ଚଟି ଉତ୍ତର-ପୂର୍ବ ରାଜ୍ୟ ପାଇଁ ଏହି ସୀମା ୮୦ ରୁ ୨୦ କିଲୋମିଟରକୁ ହ୍ରାସ କରାଯାଇଛି ।

Also Read

କୋଟିଆରେ ଆନ୍ଧ୍ର କରୁଥିଲା ଷଡ଼ଯନ୍ତ୍ର, ବିଧାୟକ ପିତମ ପାଢ଼ି ପହଞ୍ଚି କଲେ ଭଣ୍ଡୁର

ସାଙ୍ଗ ପାଲଟିଥିଲେ କି ସୈତାନ? ରହସ୍ୟମୟୀ ଯୁବତୀଙ୍କୁ ନେଇ ବଢୁଛି ଚର୍ଚ୍ଚା

ସୁନା ମୁକୁଟ ଅଛି ଚାନ୍ଦି ମେଢ଼ ଅଛି, ହେଲେ ଦେଖିବାକୁ ଭକ୍ତ ନାହାନ୍ତି.. ପୁରା ଖାଁ ଖାଁ..

ଭାରତ-ବାଂଲାଦେଶ ମଧ୍ୟରେ ୪୦୯୬.୭ କିଲୋମିଟର, ଭାରତ-ପାକିସ୍ଥାନ ମଧ୍ୟରେ ୩୩୨୩ କିଲୋମିଟର ସୀମା ସୁରକ୍ଷା ଦାୟିତ୍ୱ  ବିଏସଏଫକୁ  ଦିଆଯାଇଛି । ଏହା ବ୍ୟତୀତ ଛତିଶଗଡ ଓ ଓଡିଶାରେ ମାଓବାଦୀଙ୍କୁ ଦମନ କରିବା ପାଇଁ ମଧ୍ୟ ବିଏସଏଫକୁ ଦାୟିତ୍ୱ ଦିଆଯାଇଛି । ସୀମା ସୁରକ୍ଷା ବଳ ଅଧିନିୟମ, ୧୯୮୬ର BSF ଧାରା ୧୩୯ ଅନୁସାରେ ଏହା ସୀମା ସୁରକ୍ଷା ବଳର କାର୍ଯ୍ୟ କ୍ଷେତ୍ର ଏବଂ ସୀମାକୁ ଅଧିସୂଚିତ କରାଇବାର କ୍ଷମତା ପ୍ରଦାନ କରିଥାଏ ।