ସ୍ମାର୍ଟ ଫୋନ୍‌ ପ୍ରତି ଅଭିଭାବକ ସାବଧାନ ! ୟୁଟ୍ୟୁବ୍ ନଦେଖିଲେ ପିଲାଙ୍କୁ ନିଦ ହେଉନି, ଦେଖନ୍ତୁ ପୁରା ରିପୋର୍ଟ..

ଭୁବନେଶ୍ୱର: ସ୍ମାର୍ଟଫୋନ ଓ ସୋସିଆଲ ମିଡିଆ ଆପ୍ ପ୍ରତି ବଢୁଛି କୋମଳମତି ଶିଶୁଙ୍କ ଆସକ୍ତି । ଫେସ୍‌ବୁକ୍ ଓ ଇନ୍‌ଷ୍ଟାଗ୍ରାମ ଭଳି ସୋସିଆଲ ମିଡିଆ ଆପ୍ ବ୍ୟବହାର କରିବାକୁ ୮ରୁ ୧୮ ବର୍ଷ ବର୍ଗର ୫୨.୯ ପିଲା ସ୍ମାର୍ଟଫୋନ ରଖିଥିବା ଜାତୀୟ ଶିଶୁ ଅଧିକାର ସୁରକ୍ଷା କମିଶନ କରିଥିବା ସର୍ଭେରୁ ଜଣାପଡିଛି । ତେବେ ଚିନ୍ତାର ବିଷୟ ହେଉଛି ମୋବାଇଲରେ ଅନ୍‌ଲାଇନ ପାଠପଢା ଲାଗି ପିଲାଙ୍କ ଆଗ୍ରହ ନାହିଁ । ମାତ୍ର ୧୦ ପ୍ରତିଶତ ପିଲା ଅନଲାଇନ୍‌ କ୍ଲାସ କରିବାକୁ ପସନ୍ଦ କରିଛନ୍ତି ।

ଭୁବନେଶ୍ୱରର ୟୁନିଟ୍-୮ ଅଞ୍ଚଳର ଡି. ଶ୍ରେୟାଂଶ କୁମାର । ୧୧ ବର୍ଷୀୟ ଶ୍ରେୟାଂଶ ଷଷ୍ଠ ଶ୍ରେଣୀର ଛାତ୍ର । କିନ୍ତୁ ସୋସିଆଲ ମିଡିଆରେ ସେ ପୁରା ଆକ୍ଟିଭ୍ । ଫେସବୁକ୍‌ରେ ତାଙ୍କର ୭୬୫ ସାଙ୍ଗ । ଇନ୍‌ଷ୍ଟାଗ୍ରାମ୍‌ରେ ତାଙ୍କର ପ୍ରୋଫାଇଲ୍‌କୁ ଫଲୋ କରୁଛନ୍ତି ୩୪୭ । ନିଜର ୟୁଟ୍ୟୁବ୍‌ ଆକାଉଣ୍ଟ ବି ଖୋଲିଛନ୍ତି ଶ୍ରେୟାଂଶ । ଦିନକୁ ପାଖାପାଖି ୬ ଘଣ୍ଟା ମୋବାଇଲରେ କଟୁଛି । ରାତିରେ ୟୁଟ୍ୟୁବ୍ ନ ଦେଖିଲେ ଆଖିକୁ ନିଦ ଆସୁନି । କରୋନା ପୂର୍ବରୁ ସକାଳୁ କ୍ଲାସ୍ ଯିବାକୁ ପଡ଼ୁଥିଲା, ତେଣୁ ରାତିରେ ଜଲ୍‌ଦି ଶୋଇ ପଡ଼ୁଥିଲେ । ଏବେ କ୍ଲାସ୍ ଟେନ୍‌ସନ୍ ନାହିଁ, ତେଣୁ ଡେରିରେ ଶୋଉଥିବାରୁ ମୋବାଇଲ ଦେଖୁଛନ୍ତି ବୋଲି କହିଛନ୍ତି ଶ୍ରେୟାଂଶ ।

Also Read

କରୋନାରେ ୬, ୫୬୨ ପିଲା ବାପା-ମାଆ ଛେଉଣ୍ଡ

ରାମଦେବଙ୍କ ପିଛା ଛାଡ଼ୁନି ବିବାଦ, ଦିଲ୍ଲୀ ହାଇକୋର୍ଟ ପଠାଇଲେ ନୋଟିସ୍‌

କୃଷି ଆଇନ୍‌କୁ କଂଗ୍ରେସର ବିରୋଧ ଜାରି, ସେପଟେ ରାଜସ୍ଥାନରେ ଦଳର ସ୍ଥିତି ବିଗିଡ଼ିଲାଣି..

କେବଳ ଶ୍ରେୟାଂଶ ନୁହନ୍ତି ତାଙ୍କ ଭଳି ହଜାର ହଜାର କୋମଳମତି ପିଲା ଏବେ ସ୍ମାର୍ଟଫୋନ୍ ଓ ସୋସିଆଲ ମିଡିଆ ଜାଲରେ । ଅଭିଭାବକଙ୍କ ମତ, ଲକ୍‌ଡାଉନ ପରଠାରୁ ପିଲାଙ୍କ ସ୍ୱଭାବରେ ପରିବର୍ତ୍ତନ ଆସିଛି । ବାହାରକୁ ଯିବା ସଂପୂର୍ଣ୍ଣ ବନ୍ଦ ହୋଇ ଯାଇଥିବାରୁ ମୋବାଇଲରେ ସମୟ କାଟିବା ବ୍ୟତିତ ଅନ୍ୟ ବିକଳ୍ପ ନାହିଁ ।

ମୋବାଇଲ ଫୋନ ଓ ଇଣ୍ଟରନେଟ୍‌ର ବ୍ୟବହାର ଦ୍ୱାରା ପିଲାଙ୍କ ଉପରେ ପଡୁଥିବା ପ୍ରଭାବକୁ ନେଇ ରିପୋର୍ଟ ପ୍ରସ୍ତୁତ କରିଛି ଜାତୀୟ ଶିଶୁ ଅଧିକାର ସୁରକ୍ଷା କମିଶନ-NCPCR । ଭୁବନେଶ୍ୱର ସମେତ ଦେଶର ବିଭିନ୍ନ ସହରକୁ ନେଇ କରାଯାଇଥିବା ସର୍ଭେ ଅନୁସାରେ ଦେଶର ୮ରୁ ୧୮ ବର୍ଷ ବୟସ ବର୍ଗର ୫୨.୯ ପ୍ରତିଶତ ପିଲା ହ୍ୱାଟସ୍ଆପ୍, ଫେସ୍‌ବୁକ୍, ଇନ୍‌ଷ୍ଟାଗ୍ରାମ୍ ଓ ସ୍ନାପ୍‌ଚାଟ୍ ଭଳି ଚାଟିଂ ଆପ୍ ଲାଗି ସ୍ମାର୍ଟଫୋନ୍ ବ୍ୟବହାର କରୁଛନ୍ତି ।  କିନ୍ତୁ ଅନ୍‌ଲାଇନ୍ ପାଠପଢ଼ା ପାଇଁ ମାତ୍ର ୧୦.୧ ପ୍ରତିଶତ ଶିଶୁ ଆଗ୍ରହ ଦେଖାଉଛନ୍ତି । ସର୍ଭେ ଅନୁସାରେ ଦେଶର ୩୦.୨% ପିଲାଙ୍କ ପାଖରେ ନିଜସ୍ୱ ସ୍ମାର୍ଟଫୋନ୍ ଅଛି ।

Also Read

ଓଏସ୍‌ଏସ୍‌ସି ପିଏସ୍‌ଙ୍କ ଘରେ ଚଢଉ : ଦେଢ କେଜି ସୁନା, ସାଢେ ୩ କୋଟି ସଂପତ୍ତି ଠାବ

କେମିତି ପୋଡ଼ି ହୋଇଗଲେ ୬ ଓଡ଼ିଆ ଶ୍ରମିକ?

ଥମୁନି ପେଗାସସ୍ ଝଡ଼, ଆଲୋଚନା ପାଇଁ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ସଦନ ଆସିବାକୁ ବିରୋଧୀଙ୍କ ଦାବି

ତେବେ ଆଶ୍ଚଯର୍ୟର କଥା ୪୨.୯ ପ୍ରତିଶତ ପିଲାଙ୍କର ସୋସିଆଲ୍ ମିଡିଆରେ ଆକାଉଣ୍ଟ ରହିଛି । ୩୭.୮ ପ୍ରତିଶତ ପିଲାଙ୍କର ନିଜସ୍ୱ ଫେସ୍‌ବୁକ୍ ଆକାଉଣ୍ଟ ଥିବା ବେଳେ ୨୪.୩ ପ୍ରତିଶତ ପିଲା ଇନ୍‌ଷ୍ଟାଗ୍ରାମରେ ଆକଟିଭ୍ ଅଛନ୍ତି । ତେବେ ଏ କ୍ଷେତ୍ରରେ ଓଡ଼ିଶାର ପିଲା ବହୁ ଆଗରେ ରହିଛନ୍ତି । ରାଜ୍ୟର ୪୭.୬ ପ୍ରତିଶତ ପିଲାଙ୍କର ସୋସିଆଲ୍ ମିଡିଆ ଆକାଉଣ୍ଟ ଅଛି । ରାଜ୍ୟର ୮ରୁ ୧୮ ବର୍ଷ ବୟସ ବର୍ଗର ୬୦ ପ୍ରତିଶତ ପିଲା ଫେସ୍‌ବୁକ୍ ବ୍ୟବହାର କରୁଥିବା ବେଳେ ୩୫ ପ୍ରତିଶତ ଇନ୍‌ଷ୍ଟାଗ୍ରାମ୍ ଓ ୯ ପ୍ରତିଶତ ହ୍ୱାଟ୍‌ସଆପ୍ ବ୍ୟବହାର କରୁଛନ୍ତି । ଏମିତିକି ୨୩.୮୦ ପ୍ରତିଶତ ପିଲା ମୋବାଇଲ ନ ଦେଖିଲେ ରାତିରେ ନିଦ ହେଉ ନ ଥିବା କହିଛନ୍ତି । ପିଲାଙ୍କ ଦ୍ୱାରା ସ୍ମାର୍ଟଫୋନ୍ ଓ ଇଣ୍ଟରନେଟର ବହୁଳ ବ୍ୟବହାରକୁ ନେଇ ଚିନ୍ତା ପ୍ରକାଶ କରିଛନ୍ତି ଉଭୟ ମନସ୍ତତ୍ତ୍ୱବିତ୍ ଓ ସାଇବର୍ ଏକ୍ସପର୍ଟ ।