କଳାତ୍ମକ ଶାଢ଼ୀରେ ବନ୍ଧୁତାର ପରିଭାଷା

ଆଜି ହେଉଛି ବିଶ୍ୱ ବନ୍ଧୁତା ଦିବସ । ବନ୍ଧୁ ପାଇଁ ଦିନଟିଏ । ଆଜି ପରି ଏକ ଦୁର୍ଲଭ ଦିନରେ ବନ୍ଧୁଟିଏ ବନ୍ଧୁ ପାଇଁ ବିଭିନ୍ନ କିସମର ଉପହାର ଦିଆନିଆର ପରମ୍ପରା ରହିଛି । ତେବେ ଏହି ମହାର୍ଘ ଦିବସକୁ ଲକ୍ଷ୍ୟରେ ରଖି ଦେଶୀ ମଂଗାରେ ପ୍ରସ୍ତୁତ ହୋଇଛି ଫ୍ରେଣ୍ଡ୍ସ ଶାଢୀ । ବର୍ଷେ ଆଗରୁ ଏହି ନୂଆଁ ଡିଜାଇନର ଶାଢୀ ପ୍ରସ୍ତୁତି ପାଇଁ ସୁବର୍ଣ୍ଣପୁର ଜିଲ୍ଲାର ଜଣେ ହସ୍ତତନ୍ତ କାରିଗର ଉଦ୍ୟମ କରିଥିବାବେଳେ ଏବେ ପ୍ରସ୍ତୁତ ହୋଇସାରିଛି ଏହି କଳାତ୍ମକ ଶାଢୀ । ଏହି ନିଆରା କଳାତ୍ମକ ଶାଢୀଟି ଲାଲ ମିଶା ମେରୁନ ରଙ୍ଗରେ ପ୍ରସ୍ତୁତ ହୋଇଥିବାବେଳେ ଦେହସାରା ବନ୍ଧୁତ୍ୱର ପରିଭାଷାକୁ ନେଇ ରହିଛି ଚାରୋଟି ଭାଷାର ରଂଗଛିଟା ।

ମାତୃଭାଷା ଓଡିଆ,ରାଷ୍ଟ୍ରଭାଷା ହିନ୍ଦୀ, ରାଜଭାଷା ଇଂରାଜୀ ସହ ବଂଗାଳୀ ଭାଷାରେ ଶାଢୀରେ ଲେଖାଯାଇଛି ବନ୍ଧୁତା ଦିବସର ଅନେକ ଅମରବାର୍ତା । ଏପରିକି ଶାଢୀର ଆଂଚଲରେ ବନ୍ଧୁତା ଜୀବନର ଏକ ମଧୁର ରସବୋଲି ମଧ୍ୟ ଉଲ୍ଲେଖ ରହିଛି । ଶାଢୀଟିର କଳାତ୍ମକ ପରିପାଟିକୁ ଦେଖିଲେ ଯେକେହି ଆକର୍ଷିତ ହେବା ନିଶ୍ଚିତ ଥିବାବେଳେ ଆଜି ପରି ଦିନରେ ସ୍ୱାମୀଟିଏ ନିଜ ପତ୍ନୀ ପାଇଁ କିମ୍ବା ବନ୍ଧୁଟିଏ ବାନ୍ଧବୀକୁ ଦେବାକୁ ହୋଇପାରିଛି ଏକ ସ୍ୱତନ୍ତ୍ର ଉପହାର ।

Also Read

ବର୍ଷା ଅଭାବରୁ ଜାଲରେ ପଡୁନି ମାଛ : ଚିନ୍ତାରେ ମତ୍ସ୍ୟଜୀବୀ ପରିବାର

୫ ହଜାର ଟଙ୍କା ପାଇଁ ଦୁଇ ନାବାଳକ ପୁଅଙ୍କୁ ବନ୍ଧା ପକାଇଛି ବାପା

ଗାଁକୁ ନାହିଁ ରାସ୍ତା, ବିଜୁଳି ଆଲୁଅ ସାତ ସପନ

ଶାଢୀଟିକୁ ତିଆରି କରିବା ପାଇଁ ଶିଳ୍ପୀଙ୍କୁ ମାସାଧିକ କାଳ ସମୟ ଲାଗିଥିବାବେଳେ ଏହାର ବଜାର ଦର ୨୧ ହଜାରରୁ ଅଧିକ ରଖାଯାଇଛି ବୋଲି କହିଛନ୍ତି ସୁବର୍ଣ୍ଣପୁର ଜିଲ୍ଲା ଟିକିରାପଡାର ବିଶିଷ୍ଟ ବାନ୍ଧଶିଳ୍ପୀ ବିଶ୍ୱନାଥ ମେହେର ।