ଚିନ୍ତା ବଢ଼ାଉଛି ଆର୍‌ ଫ୍ୟାକ୍ଟର, ଭାରତରେ ଗମ୍ଭୀର ହୋଇପାରେ ସ୍ଥିତି..

ନୂଆଦିଲ୍ଲୀ: ଦେଶରୁ ଏବେ ବି ଯାଇନି କରୋନାର ଦ୍ୱିତୀୟ ଲହର । ଆଗକୁ ତୃତୀୟ ଲହର ଆଶଙ୍କା ଥିବା ବେଳେ ୮ଟି ରାଜ୍ୟରେ R-ଫ୍ୟାକ୍ଟର ଅଧିକ ରହିବା ଉଦ୍‌ବେଗର ବିଷୟ ବୋଲି କହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ସେପଟେ ଓଡ଼ିଶାରେ ଏବେ ସଂକ୍ରମଣ ତଳମୁହାଁ ରହିଛି ତୃତୀୟ ଲହର ଆସିଲେ ବି ଏହା ଦ୍ୱିତୀୟ ଲହର ଭଳି ପ୍ରଭାବୀ ହେବ ନାହିଁ ବୋଲି ଡିଏମ୍ଇଟି ଆଶ୍ୱସ୍ତ କରିଛନ୍ତି ।

ହେଲେ ବିଶ୍ୱର ଅନେକ ଦେଶରେ ଏବେ ମଧ୍ୟ ଦୈନିକ ସଂକ୍ରମଣ ଉଦବେଗଜନକ ସ୍ଥିତିରେ ରହିଛି । ଆମେରିକା, କାନାଡ଼ା, ଅଷ୍ଟ୍ରେଲିଆ ସହିତ ଭାରତରେ ଚିନ୍ତାଜନକ ରହିଛି ସ୍ଥିତି । କାରଣ ଏ ସବୁ ଦେଶରେ ଆର୍ ଫ୍ୟାକ୍ଟର ୧.୨ ରହିଛି । ଅର୍ଥାତ ୧୦ ଜଣ ସଂକ୍ରମିତ ବ୍ୟକ୍ତି ୧୨ ଜଣଙ୍କୁ ସଂକ୍ରମିତ କରୁଛନ୍ତି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ସୂଚନା ଅନୁସାରେ, ଆମ ଦେଶର ୮ ରାଜ୍ୟରେ ଆର୍ ଫ୍ୟାକ୍ଟର ୧ ରୁ ଅଧିକ ରହିଛି । ସେହିଭଳି ଦେଶରୁ ଏପର୍ଯ୍ୟନ୍ତ ଦ୍ୱିତୀୟ ଲହର ଯାଇନଥିବା ସ୍ପଷ୍ଟ କରିଛନ୍ତି ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ୱାଲ । ୧୮ଟି  ଜିଲ୍ଲାରେ ପଜିଟିିଭ୍ ସଂଖ୍ୟା ବଢୁଥିବା ବେଳେ କେବଳ କେରଳରୁ ରହିଛି ୧୦ଟି ଜିଲ୍ଲା । କରୋନା ଗ୍ରାଫ୍ ଉପରମୁହାଁ ରହୁଥିବା ୧୮ ଜିଲ୍ଲାରେ ପୁରା ଦେଶର ୪୭.୫ ପ୍ରତିଶତ କେସ୍ ଦେଖିବାକୁ ମିଳିଛି । ଆଉ ଏହାର ମୂଳରେ ରହିଛି କରୋନାର ଡେଲ୍‌ଟା ଭାରିଆଣ୍ଟ ।

Also Read

ଅଗଷ୍ଟ ୧୫ରେ ଅଲିମ୍ପିଆନ୍ସ ଦିଲ୍ଲୀ ନିମନ୍ତ୍ରଣ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି

ରିମାଣ୍ଡରେ ବିରଞ୍ଚି, ନିଯୁକ୍ତି କେଳେଙ୍କାରୀର ହେବ କି ପର୍ଦ୍ଦାଫାସ୍‌ ?

ପିଲାଙ୍କ ଭବିଷ୍ୟତ ସହ ଖେଳ? ରେଗୁରାଲ୍‌ ପିଲାଙ୍କୁ କିଏ ଦେଲା ଏକ୍ସ-ରେଗୁରାଲ୍‌ ପ୍ରଶ୍ନପତ୍ର?

କରୋନାର ଦ୍ୱିତୀୟ ଲହର ସରିନଥିବା ବେଳେ ତୃତୀୟ ଲହରର ଆଶଙ୍କା କରାଯାଉଛି । ବିଶେଷଜ୍ଞଙ୍କ ଆକଳନ ଅନୁସାରେ ଥାର୍ଡ ୱେଭ୍ ଅଗଷ୍ଟରେ ଆସି, ସେପ୍ଟେମ୍ବର ଅକ୍ଟୋବରରେ ପିକ୍‌ରେ ପହଞ୍ଚିବ । ଡିଏମ୍ଇଟି ସିବିକେ ମହାନ୍ତି କହିଛନ୍ତି, ତୃତୀୟ ଲହର ଏବେ ବି ଆକଳନ ସ୍ଥିତିରେ ଅଛି । ଯଦି ବି ଏହା ଆସେ, ତେବେ ଓଡ଼ିଶାରେ ସେତେଟା ପ୍ରଭାବୀ ହେବନି । ତଥାପି ସେଥିପାଇଁ ସରକାର ପ୍ରସ୍ତୁତ ଥିବା ସେ କହିଛନ୍ତି । ସେପଟେ ସ୍ୱାସ୍ଥ୍ୟ ବିଶେଷଜ୍ଞ ଡାକ୍ତର ନୀରଜ ମିଶ୍ର ମଧ୍ୟ କହିଛନ୍ତି, ୧୧ ସପ୍ତାହ ପରେ ସାପ୍ତାହିକ ସଂକ୍ରମଣ ହାର ବଢ଼ିଛି । ଆରୋଗ୍ୟ ତୁଳନାରେ ନୂଆ କୋଭିଡ ମାମଲା ଅଧିକ ରହୁଛି । ଆର୍-ଭାଲ୍ୟୁ ଏକରୁ ଅଧିକ ଅଛି । ଏହି ୩ଟି ସୂଚକାଙ୍କ କହୁଛି, ଆଗକୁ ଦେଶରେ କେସ୍ ଲୋଡ୍‌ ବଢିବ । ଯାହାକି ତୃତୀୟ ଲହର ଆଶଙ୍କାକୁ ଏକପ୍ରକାର ସ୍ପଷ୍ଟ କରୁଛି ।

କରୋନାର ଉତ୍ପତ୍ତି ସ୍ଥଳ କୁହାଯାଉଥିବା ଚୀନର ଉହାନରେ ମଧ୍ୟ ଡେଲ୍‌ଟା ଭାରିଆଣ୍ଟ ଯୋଗୁଁ କିଛି ଦିନ ହେଲା ଦ୍ରୁତ ବେଗରେ ବଢୁଛି ସଂକ୍ରମଣ । ଏଥିପାଇଁ ଉହାନ୍‌ର ସମସ୍ତ ୧ କୋଟି ୧୦ ଲକ୍ଷ ଲୋକଙ୍କ କୋଭିଡ ଟେଷ୍ଟ କରିବାକୁ ଚୀନ୍ ସରକାର ନିଷ୍ପତ୍ତି ନେଇଛନ୍ତି । ବେଂଜିରେ ପର୍ଯ୍ୟଟକଙ୍କ ପ୍ରବେଶ ଉପରେ କଟକଣା ଜାରି ହୋଇଥିବା ବେଳେ ଜରୁରୀ ନ ଥିଲେ ଘରୁ ନ ବାହାରିବାକୁ ପରାମର୍ଶ ଦିଆଯାଇଛି । ସେହିପରି ଅଲିମ୍ପିକ୍ସ ହେଉଥିବା ଟୋକିଓ ସମେତ ଜାପାନରେ ମଧ୍ୟ ବଢୁଛି କରୋନା ସଂକ୍ରମଣ । ଟିକା ନେଇଥିଲେ ମଧ୍ୟ ବୟସ୍କମାନେ ଦ୍ୱିତୀୟ ଥର ସଂକ୍ରମଣର ଶିକାର ହେଉଥିବା ଦେଖିବାକୁ ମିଳିଛି । ସେହିପରି ଆମେରିକାରେ ୫୦ ପ୍ରତିଶତ ଲୋକଙ୍କୁ ଉଭୟ ଡୋଜ୍ ଟିକା ଦିଆଯିବା ସତ୍ତ୍ୱେ ଏଠାରେ ଏବେ ଦିନକୁ ପ୍ରାୟ ୮୫ ହଜାର କେସ୍ ଚିହ୍ନଟ ହେଉଛି ।